Борусија Дортмунд с` поцврсто чекори кон титулата шампион на Германија. Улогата на апсолутен фаворит во фудбалската Бундеслига ја потврди со победа од 3-1 на гостувањето на „Алијанс арена“ против актуелниот германски шампион Баерн Минхен. „Милионерите“ за кратко време почувствуваа дека се подобар противник и со погодоците на Бариос во 9. и Сахин во 18. на два пати обезбедуваа водство, по израмнувањето на домаќинот преку Густаво во 16. минута. Триумфот го потврди Хемелс, на половина час пред крајот на средбата.

Убедливиот лидер на табелата, за прв пат по 19 години оствари победа во Минхен против големиот ривал.

- Овој ден беше нешто посебно за нас. Работевме многу и победата беше заслужена, а тоа можеше директно да се види во 198 земји низ светот - наведе Јирген Клоп, тренерот на Борусија Дортмунд, која сега има 16 бода повеќе од актуелниот бранител на титулата.

Колегата од спротивниот табор, Луис ван Хал, не сакаше децидно да го признае поразот.

- Нивната победа се темелеше на наша грешка на средината на теренот при постигнувањето на првиот гол. Едноставно ги постигнаа головите во вистинско време - рече Ван Хал.

Ова беше дури 11. победа на гости за Борусија Дортмунд, која на домашен терен има само седум добиени средби.

Николче Новески го одигра целиот меч за Мајнц кој оствари победа од 2-1 кај Хофенхајм. Мајнц има завидливи осум победи на гости и се наоѓа на петата позиција која води во европските натпреварувања.

Резултати и стрелци: Волфсбург - Борусија М. 2-1 (Диегу 36, 45 - Демс 74 пен.), Келн - Фрајбург (Подолски 89), Шалке - Нирнберг 1-1 (Раул 52 - Хегелер 37), Хофенхајм - Мајнц 1-2 (Алаба 83 - Ивфаншиц 23, Сото 86), Кајзерслаутерн - Хамбургер 1-1 (Хлоушек 18 - Јансен 55), Сент Паули - Хановер 0-1 (Шулц 89), Баерн М. - Борусија Д. 1-3 (Густаво 16 - Бариос 9, Сахин 18, Хемелс 60).

Табела: Борусија Д. 58, Баер Л. (-1) 45, Хановер 44, Баерн М. 42, итн.

Новески во топ-10 дефанзивци во Бундеслигата

Македонскиот репрезентативец Николче Новески е осми на листата најдобри дефанзивци во германската Бундеслига по завршувањето на есенската полусезона, составена од магазинот "Кикер". Капитенот на Мајнц настапи на сите 17 натпревари на својот клуб и со просечна оценка 3,24 е пред Лукаш Пишчек од Борусија (Д), Мартин Амедик од Кајзерслаутерн, Филип Лам од Баерн и Јорис Матајсен од Хамбургер. Прв на листата е Матс Хумелс од Борусија (Д), пред Жеромел од Келн и Невен Суботиќ, исто така, од Борусија (Д). Четврти е соиграчот на Новески, Кристијан Фухс.
Триесет и едногодишниот битолчанец беше столб на одбраната на есенскиот вицепрвак во Германија, која прими само 19 голови, што е полошо само од лидерот Борусија. Покрај одбранбените задачи, Новески успеа да постигне и еден гол во победата од 3:0 над Нирнберг во ноември.
Тој му се приклучи на Мајнц во 2004 година и оттогаш има повеќе од 200 настапи. Актуелниот договор му е со важност до летото 2013 година.