F1 Вести

Фернандо Алонсо ќе ја брка четвртата последователна победа за Ферари на Белгиското ГП и се надева дека Марк Вебер повторно нема да блесне во Спа. Лидерот во генерален пласман, Вебер, кој победи четири пати во 12 трки за Ред Бул оваа сезона се уште нема подиум во Спа, и покрај тоа што брзата патека на Ардените е негова омилена.

Алонсо, кој беше втор на претходната трка во Унгарија, и победник на контроверзното Германско ГП пред тоа, кога Ферари ги користеа забранетите тимски наредби, мора да освои максимум поени за да ја намали разликата од 20 поени од Австралиецот.

Дури и да го направи тоа, неговата шанса за титулата зависи од сослушувањето пред Светскиот Моторспорт Совет (ВМСЦ) на 8 септември во Париз, каде што ФИА може да реши да даде и дополнителна казна за Ферари покрај таа од 100.000è. И покрај се ова, двократниот светски шампион е оптимист за победа на патеката на која Ферари има пет победи во последните 7 години.

"Ни требаа само две нормални трки да се вратиме во борбата за титулата. Сега сме на вистинскиот пат, и болидот е многу подобрен. Оптимист сум бидејќи видов како целиот тим добива самодоверба. Во Спа имаме уште нови работи и се надевам дека ќе бидат успешни", вели Алонсо.

Колегата на Алонсо, Бразилецот Фелипе Маса ја доби победата во Спа во 2008, кога Хамилтон беше казнет за "сечење" на шикана. Маса и Михаел Шумахер се единствените двајца активни возачи со победа во Белгија.

МЕКЛАРЕН УШТЕ РАЗМИСЛУВААТ ЗА КРИЛОТО НА РЕД БУЛ

Од вторите големи ривали на Ред Бул, Мекларен пак велат дека се уште не го разбираат предното крило на Ред Бул пред Белгиското ГП. Предните крила беа во центарот на контроверзите последните две трки откако се појавија фотографии на кои крајните делови на предните крила на Ферари и Ред Бул беа екстремно блиску до патеката, со што се зголемува надолната сила, и Мекларен побараа објаснување од страна на ФИА.

Овој викенд во Белгија, крилата ќе бидат поставени на потешки тестови од ФИА, но ова не гарантира дека Ред Бул ќе направат промени. Генералниот менаџер на Мекларен, Џонатан Нил вели дека неговиот тим работи со ФИА за да се осигураат дека МП4/25 ќе го помине тестот, но не знае што ќе се случи со ривалите.

"Да бидам искрен, ги прочитав сите магазини, ги видов сите снимки на веб-сајтот на ФОМ и се уште не можеме да објасниме зошто болидите на Ред Бул и Ферари работат така како што работат. Сигурни сме дека нашиот болид нема такви крила, а за ривалите само можеме да шпекулираме и да чекаме ФИА да го направи своето. Се надевам дека техничкиот делегат на ФИА, Чарли Вајтинг ќе ги објасни работите за следната трка, бидејќи ова не е ситуација која ни се допаѓа", вели Нил.

Главниот инжинер на Мекларен, Педи Лоув вели дека неговиот тим ќе донесе три предни крила на Белгиското ГП, но не сакаше да дава детали за спецификациите.

"Носиме добар опсег на предни крила за Спа и ќе ги тестираме во петокот за да видиме кое одговара најмногу. Се работи за необична патека така што крилата се малку поинакви и имаат поинакви спецификации. И покрај се што се пишува за крилата, ние се фокусираме на нашиот ауспух и на дизајнот кој го развиваа Ред Бул. Тука треба да ја вратиме предноста", додава Лоув.

Шуми признава: "Не сум на нивото на Розберг"

Михаел Шумахер признава дека не е на "нивото" на колегата од Мерцедес ГП тимот, Нико Розберг, но дека тоа може да го поправи. Шумахер беше победен 10 пати од својот помлад колега на квалификациите и има 56 поени помалку од него во генерален пласман.

"Ги гледам сите детали. Вистина е дека според тоа како се однесува нашиот болид во моментов, не сум на неговото ниво, посебно на квалификациите. Во трките е доста израмнето. Но, јас знам точно како можам да го сменам тоа и работам на програмата", вели Шумахер.

Тој објаснува уште еднаш дека ракувањето со болидот воопшто не му одговара и дека тоа мора да се смени за 2011.

"Секој возач си има сопствен стил и морате да работите со вашиот тим за да бидете сигурни во пакетот. Успеав да го направам тоа со Ферари, но не се постигнува веднаш. Не е тајна дека сегашниот болид има многу карактеристики кои не ми одговараат. Зошто се вратив? Бидејќи уживам во мојата работа и бидејќи верувам во целта - да се освои титулата. Потребно е време, иако сите верувавме дека ќе имаме конк*рентен болид оваа година", додава Шумахер.

Тој повторно доби подршка од носителот на комерцијалните права Берни Еклстоун, кој смета дека доколку Шумахер возел болид на Ред Бул ќе победувал и ќе бил кандидат за титулата.

"Кога некој ќе каже дека Нико Розберг е побрз од Михаел, им велам дека Нико се уште треба да се докаже. За Нико, четвртите места се важни, а не за Михаел. За него се важат само победите. Да возеше болид на Ред Бул ќе се обложев на него", изјави Еклстоун.


ФИА наскоро ќе го открие новиот тим

Се очекува Светската Автомобилистичка Федерација (ФИА) во следните неколку денови да го открие својот избор за 13. место во формула 1 следната година. По откажувањето на АРТ Гран При и Сајпер Групацијата за местото кое остана празно по колапсот на УСФ1, битката за слободното место се одвива помеѓу тимовите на Стефан ГП, Дуранго/Вилнев групацијата и Епсилон Еускади.

Оваа листа може да биде уште повеќе намалена ако се верува на шпекулациите дека Епсилон Еускади сакаат да се спојат со тимот на Хиспанија Рејсинг. Ако ова се случи фаворит ќе биде партнерството помеѓу Дуранго и поранешниот Ф1 шампион Жак Вилнев.

"Ние ја направивме нашата презентација, но не добивме реакција. Не знам што се случува со плановите на другите тимови. Се работи за се или ништо - или ќе добиеме се или се ќе падне во вода. Одлуката ќе дојде до крајот на месецот", вели Вилнев.

Ф1 ФЛЕШ

Форс Индија тимот ги отфрли шпекулациите дека е можно нивните болиди и транспортери да бидат запленети на Италијанското ГП во Монца поради судскиот случај со италијанската компанија Аеролаб, која пред судот во Лондон доби одлука со која Форс Индија мораат да им исплатат 1.074 милиони евра. Од Форс Индија велат дека казната е платена. "Судот одлучи дека има два случаи кои се посебни и Форс Индија ја плати казната", велат од Форс Индија.

Патеката Лосаил во Катар има посебен план со кој би се приклучела на формула 1 шампионатот во блиска иднина. Лосаил веќе е домаќин на ноќна Мото ГП трка, и сега се планираат модификации со кои би можеле да се тркаат и формула 1 болиди. "Во нашиот стратешки план е формула 1 трка, и веќе работиме на тој план", вели Насер Бин Халифа Ал Атијах, претседателот на Моторспорт Федерацијата на Катар. Средниот Исток веќе има две трки во Бахреин и Абу Даби.

Снабдувачот на пневматици за следната сезона Пирели ќе патува на патеката Пол Рикар во Франција за продолжување на тестирањето со поранешниот возач на Мерцедес ГП, Ник Хајдфелд. Пирели веќе тестираше на патеката во Мугело во средата и четвртокот со стариот болид на Тојота од 2009 година. Се верува дека и Бен Хенли ќе вози ГП2 болид за Пирели, бидејќи следната година тие ќе ја снабдуваат со пневматици и ГП2 серијата.

Дејвид Култхард вели дека неговиот поранешен тим Ред Бул Рејсинг останува прв фаворит за титулата оваа година и покрај силните ривали од Ферари и Мекларен. "На кого би ги ставил парите? Луѓето ќе кажат дека сум пристрасен поради врските со тимот, но мислам дека по следните две трки во Белгија и Италија ќе биде јасно дека РБ6 болидот ќе биде најбрзиот и ќе влезат како огромни фаворити за трките надвор од Европа", вели Шкотланѓанецот.