F1 Вести

Ферари не пријавува тим за 2010

Ферари потврдија дека нема да влезат во Светскиот Шампионат следната година доколку плановите за доброволно ограничување на буџетот од 40 милиони фунти останат. Иако тимот веќе најави дека не се согласува со планот на Светската Автомобилистичка Федерација (ФИА), со ова соопштение по состанокот на бордот на Ферари во Маранело во вторникот се станува кристално јасно.

"Исти правила за сите тимови, стабилност во регулативите, продолжување на обидите на ФОТА методиски и прогресивно да се кратат трошоците и водењето на одговорна формула 1. Тоа се приоритетите за иднината. Ако овие принципи не се почитуваат и ако не се воведат регулативи за 2010 кои ќе бидат разумни, тогаш Ферари нема намера да аплицира за формула 1 шампионатот", се вели во соопштението од Маранело.

Последниот рок за доставување на апликации за 2010 е на 29 мај, а Тојота и двата тима на Ред Бул веќе најавија дека нема да аплицираат доколку правилата останат исти. Исто така се оценува дека и другите производители ќе се приклучат на бојкотот, и дека само независните тимови Браун ГП, Вилијамс и Форс Индија ќе аплицираат.

Како и кај другите тимови, главната загриженост на Ферари е за ткн. "систем на подвоен шампионат", бидејќи некои тимови ќе решат да се натпреваруваат со ограничен буџет и со далеку поголема техничка слобода, додека тие кои ќе решат да трошат слободно ќе бидат "хендикепирани".

"Иако состанокот на Светскиот Моторспорт Совет (ВСМЦ) на 29 април беше свикан за да се разгледаат дисциплински мерки против еден тим, одлуките кои беа донесени значат дека во 2010 за првпат ќе има двојни правила кои ќе бидат поставени на економски параметри. Ако тоа претставува слика за иднината на формула 1, тогаш причините поради кои Ферари учествува во формула 1 во последните 60 години, како единствен тим кој учествува од 1950, нема веќе да постојат", се додава во изјавата.

Иако Ферари се целосно против правилата во Ф1 за 2010, исто така како проблем се јавува и начинот на водењето во спортот и вклученоста на тимовите во одлуките.

"Правилата на водење кои придонесоа за раст на формула 1 во последните 25 години не се земаат во предвид, како и обврзувачки договори помеѓу ФИА и Ферари околу стабилноста на регулативите. Ферари знае дека фановите ќе ја сфатат оваа тешка одлука, но мораме да останеме на нашите принципи - спортски и технички", завршува соопштението на Ферари.

Ред Бул се надеваат дека на следната трка во Монако ќе имаат нови подобрувања со кои ќе можат да бидат поблиску до лидерите Браун. Марк Вебер и Себастијан Фетел во неделата беа на третото и четвртото место зад болидите на Браун во Шпанија, а главниот дизајнер Адријан Њуи се надева дека тимот ќе го има новиот двоен дифузер за трката на 24 мај. "Се работи за нешто што мораме да го завршиме бргу иако нашиот капацитет не е толку голем. Не е лесно само да се постави двоен дифузер бидејќи тој не е дизајниран за нашиот болид од стартот", вели Њуи.

Шефот на Ферари, Стефано Доменикали, вели дека единствената позитивна работа за италијанскиот тим од Шпанското ГП е подобрената брзина. Кими Раиконен се откажа поради механички проблем, додека Фелипе Маса заврши како шести откако забави за да сочува гориво. "Мислам дека брзината е единствениот позитивен аспект. Без проблемите Фелипе речиси сигурно ќе се бореше за подиум. Шампионатот не е завршен и треба да се погрижиме да не се повторат грешките", вели Доменикали.

По доминацијата на Браун ГП тимот и проблемите на Мекларен, Мерцедес-Бенц размислува да го додаде своето лого на БГП001 болидот на Браун. По пет трки Браун води убедливо во генерален пласман. "Има можности да се додаде ѕвездата на болидите на Браун. Ќе размислиме за тоа, но не сакаме да се откажеме од партнерството со Мекларен", вели Норберт Хауг од Мерцедес-Бенц.

Ред Бул би се повлекле од Ф1, и Бриаторе се заканува



Тимот на Ред Бул е вториот во само два дена кој најавува можно заминување од формула 1 доколку не се случи промена на регулативите за 2010. Со опција на ограничен буџет од 40 милиони фунти, се појавува можност на две "паралелни" серии во Ф1 и тоа не наиде на добар одзив кај тимовите. Тојота јавно објавија дека е можно да се откажат од формула 1 во текот на Шпанското ГП, а сега тоа го вели и Дитрих Матешиц, австрискиот магнат зад тимовите на Ред Бул и Торо Росо.
"Ако предвидените правила за 2010 останат непроменети, ние нема да бидеме во формула 1 шампионатот. Тимовите кои се со производители нема да учествуваат и од сегашните тимови ќе останат само два-три", вели Матешиц.
Рено не се приклучува на заканата за бојкот, но шефот на тимот, Флавио Бриаторе, јасно посочи дека е против ограничениот буџет. Засега само Вилијамс, Браун ГП и Форс Индија ги поднесоа документите до ФИА.
"Со 20 или 25 милиони евра не смееш да можеш да водиш Ф1 тим. Ако го овозможиме тоа, тогаш брендот Ф1 нема да значи ништо. Тоа е како на улица со ексклузивни продавници да отвориш евтина продавница. Без големите имиња, а Ферари е едно од нив, Ф1 не вреди ништо", вели 59-годишниот Бриаторе.

Хамилтон во дебела сенка на Батон

Водечкиот во Шампионатот на Ф1- по пет трки има 32 поена повеќе од бранителот на титулата

Двајцата британски возачи во Формула 1 продолжија со заземањето спротивни краишта од спектрумот минатиот викенд кога Џенсон Батон додаде уште еден плус во својот старт од соништата додека Луис Хамилтон остана да се бори со кошмарот што изгледа како да нема крај за него сезонава. Браун ГП беше доминантен и во неделната трка во Барселона, па ако беше прифатен планот на Берни Еклстоун за доделување медали по урнек на олимпијадите Батон ќе беше на добар пат да ја обезбеди титулата пред паузата во август. Во петтата трка сезонава, Големата награда на Шпанија, 28-годишникот ја забележа својата четврта. Дури и според сегашниот систем на бодување, големи се шансите шампионатот да биде решен доста пред ноемвриското финале во Абу Даби.

Батон повторно освои повеќе поени во еден викенд од бранителот на титулата Хамилтон од Мекларен, кој заврши деветти. И покрај тоа што доби само половина од поените за својата победа во прекинатата трка поради дожд во Малезија, Британецот води кај возачите со 41 поен, 14 повеќе од тимскиот колега Рубенс Барикело, а Хамилтон е седми со само девет бода. Батон сам има освоено само 1,5 поен помалку од Ферари, Мекларен, Рено, БМВ Заубер, Вилијамс, Торо росо и Форс Индија заедно! Браун ГП, пак, има повеќе поени (68) од второпласираниот Ред бул (38,5) и Тојота (26,5) заедно.

„Сонот ни се оствари во досегашниот тек на сезоната“, изјави Батон по втората еден-два победа на Браун годинава. „Дури и кога изгледа тешко, способни сме да победиме. Кога оди - оди, нели? Така беше и лани. Кога тргна лошо, заврши навистина лошо. Навистина се чувствувам како да сум на врвот на светот во моментов“.

Првата трка во Европа сезонава малку придонесе за зголемување на самодовербата на страдалничката елита, која од своите претходни височини годинава тресна на земја. Браун е недофатлив, а Ред бул се' уште му е најблизок гонител. Шампионот Ферари покажа знаци на напредок, но и понатаму го мачи непостојаноста. Мекларен го нема никаде.

„Што да правам? Го оставив срцето на патеката, како и секогаш“, слегнува со рамената Хамилтон. „Едноставно, болидот не е добар. Срамота е што не ми дадоа болид со кој ќе можев да ја бранам титулата. Тој е толку лош. Безнадежен. Во моментов е сигурно дека немаме болид за освојување на првенството, иако тимот работи напорно и моралот е на високо ниво“.

Пешкирот практично го фрли во рингот и вицешампионот Фелипе Маса од Ферари, изјавувајќи дека Браун и Батон отидоа премногу напред за да бидат достигнати од Бразилецот и од неговиот тим, но тимскиот шеф на Мекларен, Мартин Витмарш, не прифаќа дека играта заврши.

„Ова беше многу тежок викенд, но има и некои позитивни страни“, изјави тој. „Ние ќе продолжиме да притискаме. Ние сме борци, ние сме возачи и ќе продолжиме да се бориме“.

Иако плановите на УСГПЕ за влез во формула 1 од следната сезона се познати, Берни Еклстоун најавува дека има два американски тима кои се борат за место. Шпекулациите велат дека ИндиКар тимовите Пенске и Андрети Грин се заинтресирани за трансфер од другата страна на Атлантикот. "Има два американски тимови. Тоа е супер, што има нови лица", вели Еклстоун.