Скопскиот аеродром ги крена Грците

ПО ПРЕДЛОГОТ АЕРОДРОМот „скопЈе“ да се преименува во „александар македонски“

Името на скопскиот аеродром ги крена Грците на нозе

Директорот на скопскиот аеродром вели дека за новото име е избрана историска личност поврзана со поимот Македонија, а за Атина таквиот предлог ги предизвикува националните чувства на Грците

Со предлогот скопскиот аеродром да го добие името „Александар Македонски“ поранешната југословенска Република Македонија ги предизвикува нашите национални чувства, е ставот со кој заменик-министерот за надворешни работи на Грција Стелиос Папатемелис излегол пред шефицата на дипломатијата Дора Бакојани, пренесуваат грчките медиуми.

Тие предлогот го толкуваат како притисок врз Грција. Некои од нив пишуваат дека предлогот за името на аеродромот е „новата карта што соседната земја ја фрла на масата“.

Официјални реакции од владата во Атина се' уште нема, но медиумите потсетуваат дека патот на Македонија до ЕУ и НАТО води преку Грција.

„ПЈРМ треба да знае дека во Грција постои политичка волја за директно попречување на нејзините преговори со НАТО и со ЕУ. Не се исклучува да следува и полоша мерка“, предупредуваат грчките медиуми.

Директорот на скопскиот аеродром Зоран Крстевски вчера рече дека намерата со преименувањето на воздушното пристаниште не била никој да се чувствува испровоциран.

- Сакаме само на аеродромот да му дадеме име на една голема историска личност е поврзана со поимот Македонија. Повеќето аеродроми носат или локални имиња или на големи историски личности. Ние сметаме дека со името на Александар Македонски, кој е општоисториска личност, на најдобар начин ќе се излезе од локалните рамки - изјави Крстевски.

Некои од медиумите во Грција коментираат дека со преименувањето на скопскиот аеродром, „ПЈРМ уште еднаш ја фати на спиење грчката дипломатија“. Дури се шпекулира дека предлогот е смислено даден во предвечерието на празникот што го слави целиот западен свет.

Жана П.Божиновска