Ивонагејт & останати новинарски афери

Македонската асоцијација на новинари (МАН) отвори телефонска линија за помош на Ивона Талевска, новинарката на „Сител“ и „Вечер“ која мора со 1.500 евра да преживува како мечка во пештера. Талевска била принудена и да ја огласи својата Ланча за продавање и да се откаже од купување станови поради тешката финансиска состојба.

„МАН апелира до сите хумани граѓани да донираат и да покажат милост за новинарите за кои мислат дека се заштитени мечки, а всушност се мечки во хибернација. Нашата колешка откако тендерот за фирмата „Визарис“ беше поништен поради „малку неетични“ причини, се наоѓа во независна позиција да се прехрани и да ги задоволи сите свои потреби со бедни 90.000 денари месечно. Завртете на бројот и помогнете“, се вели во соопштението на новинарската асоцијација.

Воедно, МАН апелира до сите кои сакаат да ја честат кафе Ивона, да се јават во просториите на организацијата.