Вардар ремизираше (0-0) на реванш  дуелот со БАТЕ Борисов, не успевајќи да ја надмине негативата од 2-3 од првиот меч во Белорусија и веќе на стартот завршувајќи го својот настап во квалификациите од Лигата на шампионите. Националната арена „Филип втори“ беше исполнета до последното место, на фудбалерите им беа обезбедени идеални услови за игра, но се беше попусто кога избраниците на Илчо Ѓорѓиоски не одговорија на предизвикот, одиграа далеку под своите можности и на крајот заслужено со наведнати глави го напуштија теренот, жалејќи за оној кошмарен финиш на првиот меч во Борисов, кога примија два гола за три минути во судиското продолжение.

Во 9. Минута за малку ќе се случеше вистински шок за сите присутни на „Филип втори“, Вајс слабо интервенираше, Захов непотребно истрча надвор од сопствениот шеснаесетник, но за наша  среќа ударот на Родионов заврши сантиметри крај голот на „вардарци“. Оваа шанса како да ги шокираше македонските фудбалери, кои што целосно му ја препуштија иницијативата на противникот. Во 18. Минута во својот шеснаесетник слабо интервенираше Илиевски, но повторно фудбалерите на БАТЕ не беа најумешни во реализацијата на шансите. Само една минута подоцна следеше нова шанса на белорускиот првак, овојпат шутираше Контсевој, но топката заврши во дирекот.

„Црвено-црните“ потоа ја консолидираа играта, повеќе ја имаа топката во свој посед, но никако не успеваа да создадат шанса за гол во противничкиот шеснаесетник. Во 34. Минута, нова можност пред голот на Вардар, овојпат Волошко втрча од позадина, шутираше силно, но Захов одбрани.

Во 36. Минута, конечно шанса за Вардар и голем број на воздишки меѓу присутните. Цикарски нафрли одлично на вториот дирек, гостинскиот голман лошо го процени летот на топката, но Темелков наместо да ја смести топката во мрежата шутираше крај голот.

Вториот дел почна со шанса на БАТЕ, повторно Родионов се најде во идеална ситуација, но од пет метри го погоди во главата голманот Захов. Гостите долго време доминираа, но навивачите ги мотивираа македонските фудбалери да заиграат на повисоко ниво. Следеше нова шанса по едно непотребно излетување на гостинскиот голман, но Ранѓеловиќ наместо да се обиде да го лобува шутираше по земја, па Горбунов одбрани. И покрај обидите да се стори нешто повеќе, фудбалерите на Вардар делуваа немоќно да создадат шанса, во финишот во игра влезе и дефанзивецот Бојовиќ, кој доби улога на напаѓач, но ниту тоа не вроди со плод.Буквално во последните моменти од мечот Јован Костовски имаше можност со глава да предизвика еуфорија на „Филип втори“, но неговиот удар беше одбранет од страна на гостинскиот голман. Така, реваншот во Скопје заврши со најнепопуларните 0-0, кои го означија и крајот на оваа европска авантура на најтрофејниот македонски фудбалски колектив.  

ВАРДАР – БАТЕ БОРИСОВ    0-0

Арена: „Филип втори“ во Скопје, Гледачи: 30.000, Судија: Паоло Валери (Италија)

ВАРДАР: Захов, Илиевски, Цикарски, Вајс, Таневски, Темелков, Ранѓеловиќ (Бојовиќ 90), Стјепановиќ (Маневски 75), Хименез (Стојаковиќ 46) Георгиев, Костовски

БАТЕ БОРИСОВ: Горбунов, Лихтарович (Рудзик 73), Јуревич, Бордачев, Радзиомау, Симиќ, Олекнович, Волошко, Мозолевски (Паулау 79), Радков, Контсевој