Како е да живееш со Маестро, а како е да си внук на Манданата, која е Џеси што од дете го направила во маж, а каква страст доживеал со "Мирна из Ниш". Уште многу скриени скопски, македонски и балкански легенди, актерски, музички, градски, за кои никогаш или ретко јавно зборувал, се дел од новата книга на Игор Џамбазов, "Облечен човек".

Во кафе-барот "Форца" во Скопје беше тутма. Џамбазов даде јавна покана за промоција на четвртата книга. За потпис се туркаа, главно, млади, кои се родиле во времето кога тој бил на турнеја со Стериино позорје, но дојдоа и многу негови пријатели. Меѓу нив, и хрватскиот актер со светска кариера, Раде Шербеџија. Малкумина го забележаа, седеше на маса со Игор и со издавачите од "Три", но Игор го најави во свој стил.

"'Ослободувањето на Скопје' се снима до петок, а Раде ми измисли една улога зашто ми е другар, колку да не се лутам. Тој одвои време да дојде и покрај сиот метеж околу снимањето. И да ви кажам, во овој филм цела Битола е исплатена", се шегуваше Џамбазов. "Во моите поранешни книги, го нареков Раде Шербеџиев, тој беше единствениот без прекар. Самиот си го бараше, и сега навистина стана Шербеџиев. Ќе се покаеш за таа одлука, пријателе мој, ама ќе биде доцна", додаде Игор низ смеа.

Актерот и шоумен ги насмеа гостите пресметувајќи колку вреди.

"Книгата се продава по цена од 450 денари. Немој да сте ми кажале дека тоа е многу. Пресметав, јас и мојата книга вредиме колку две пици и едно пиво во популарните скопски пицерии. Едно пиво, луѓе, со тие пари, второ не добиваш. Ако јас и мојот живот не вредиме барем толку, тогаш ќе се самозапалам", е математиката на Џамбазов. 
Актерот додаде дека му е драго што младите луѓе, кои во претходните свои книги ги учел како не треба, се на промоцијата во најголем број.

"Писател е оној што има што да каже. Четвртата книга на Игор ги поместува границите на литературата", беа дел од зборовите на издавачот Винка Саздова за "Облечен човек". Издавачкиот центар "Три" годинава слави 15-годишен јубилеј. 

М. Џаровска
Фото: Д. Перковски