Кој е најсилен на Балканот?

Српскиот интернет портал “Телеграф” објави податоци за вооруженоста на државите на Балканот, посочувајќи ја Србија како најголема воена сила.

Значи, српската војска има најголем број на тенкови и авиони, додека Македонија е една од послабо вооружените.

Имено, според податоците од Министерството за одбрана на Србија, оваа земја котира високо во регионот и е еден од најважните фактори, а воедно важи и за најразновидна и најголема воена сила на Балканот која поседува 33.000 војници, 80 авиони и 272 тенкови.

Споменатиот интернет портал прибрал податоци и од министерството за одбрана на Црна Гора, Хрватска, Словенија, Босна и Херцеговина, Бугарија, Романија и нашата Македонија. Во споредба со сите овие балкански земји, само Романија има 28 тенкови повеќе од Србија, но има и 25 авиони помалку од нашиот северен сосед.

Во војската на Србија е најавена и модернизација со купување на нови руски авиони, па со тоа оваа земја дополнително ќе го зацврсти местото на пиедесталот помеѓу воените сили на Балканот. Така, со купувањето на новиот авион “Mig-29M/M2″, Србија ќе стане доминантна на небото над Балканот.

Српскиот воен аналитичар Александар Радиќ изјавил дека Србија е наследничка на ЈНА и како таква останала една до најголемите воени сили во регионот и тоа дури и кога станува збор само за официјалните податоци.

“Војската на Србија наследила и сочувала доста техники од ЈНА и како резултат на овој факт, таа е значајна воена сила во регионот. Овие податоци за тенковите, авионите и другите воени средства се официјални, но кон нив треба да се додадат и количествата на средства кои што се чуваат во стратешките резерви и кои никогаш не се откриваат”, додал Радиќ.

Податоци за војските во регионот:

-Србија: Воено неутрална, но членка на Партнерството за мир и набљудувач во “Руското” НАТО. Поседува 80 авиони и 272 тенкови.

-Словенија: Членка на НАТО и поседува 24 авиони и 54 тенкови.

-Хрватска: Членка на НАТО, а поседува 32 авиони и 86 тенкови.

-Босна и Херцеговина: Членка на Партнерството за мир. Поседува 19 авиони и 188 тенкови.

-Црна Гора: Членка на Партнерството за мир. Поседува 4 авиони, а тенкови нема.

-Македонија: Нашата држава е членка на Партнерството за мир. Поседуваме 31 тенк, а авиони немаме.

-Бугарија:Членка на НАТО и поседува 70 авиони и 86 тенкови.

-Романија: Членка на НАТО и поседува 55 авиони и 300 тенкови.