Децата сонуваат за дружба со своите омилени филмски или цртани херои. Поради ова и се радуваат кога нивните омилени филмски или цртани карактери успеваат да се интегрираат во ентериерот на детската соба. Ах, на дружбата ќе ѝ нема крај.

Како да се изведе ова? Суперхероите обично пристигнуваат преку постери за ѕидот од детските списанија, добар обид се и завесите и постелнините со елементи од омилениот цртан и суперхерој. Меѓутоа, највпечатлив за децата е мебелот со апликации од нивните омилени цртани и играни филмови, дури и во форма на ликовите. Компанијата „Cia International“, добрата вила што ги остварува детските желби, дизајнира мебел за детски соби во кој се вметнати апликации од суперхероите на „DC Comics“, како шкафови со апликации од различни сцени на стриповите со суперхерои и  кревет со рамка во форма на главата на познатото цртано маче „Hello Kittу“. Покрај огромната насмевка кај детето, ваквите елементи го трансформираат едноставно и брзо детскиот простор во привлечно катче за играње, спиење и за учење.

Уредувањето на детската соба и дизајнирањето за деца не поминува без доза авантура, креативно размислување и весел спој на динамични, интензивни бои и смели концепти. Оваа креативна игра се забалежува и во дизајнот за детска соба на дизајнерски тим на италијанската компанија за мебел „Nidi Design“, уредена во современ стил.

Дизајнот е спој од елементи што се истовремено и практични, но и со современ и естетски привлечен лик. Уреден во комбинација од сиви, црвени и бели тонови, детскиот ентериер има едноставна современа дизајнерска естетика, сепак носи со себе и дел од детската безгрижност, фантазија и желба за авантура. Колекцијата мебел што дизајнерите од „Nidi Design“ специјално ја дизајнираа за оваа детска соба преку едноставни форми и детали внесува смелост, светлина и воздушност во детскиот простор. Собата делува делумно сериозно, за да одговори на барањата кога малото дете ќе стане тинејџер, но и еднакво забавно преку внесувањето елементи како гардеробер на кој може да се прави пиши-бриши на цртежи со маркери.

Мебелот е со мазни структури извајани од дрво и тенки ногарки од метал, кои ѝ даваат леснотија на структурата штто изгледа како да лебди во воздухот. Сите парчиња мебел се комбинација од бела и специфична црвена нијанса со пастелна нота, што создава контраст наспроти ѕидните и подните површини во груба индустриска сива нијанса.