Macedonia-Timeless на CNN

Деновиве се најавува премиерно прикажување на Си-Eн-Eн на  четвртиот во низатa спотови за туристичко рекламирање на Македонија.  Автор на сценариото и на режијата е Милчо Манчевски.  Ова е прв спот специјализиран за одреден сегмент на туризмот, односно за сакрален туризам (цркви, манастири и џамии).  Спотот е насловен Македонски храмови (Macedonian Temples).

Продолжувајќи ја темата од циклусот Македонија - вечна, овој
спот го прикажува единството на природата и човекот во сакралните објекти во Македонија.  Вечното течение на времето е преточено во магична промена на светлото, боите и сенките од страна на директорот на фотографија Мишо Ристов.  Во контрапункт, ноќните сцени се случуваат во хипер-урбана средина.  Како дел од циклусот, повторно е употребена современа обработка на народната песна Учи ме, мајко, карај ме во аранжман на Кирил Џајковски.  Продуцент на спотот е Елена Станишева.
 
Спотот е сниман во период од скоро два месеци на локации во Зрзе, Варош, Матка, Вељуса, Велес, Мустафа-Пашина Џамија и ГТЦ во Скопје.  Употребени се методи и технологија кои вообичаено се користат за снимање на популарни документарци - вложени се стотици часови снимање, a снименото потоа трпеливо e обработуванo со најсовремени специјални ефекти.

Ова е четврт спот во циклусот Македонија - вечна.  Премиерниот го режираше Милчо Манчевски, вториот во серијата е на Игор Иванов - Изи, а третиот е на Ѓорче Ставревски.
 
Првиот спот на Манчевски освои прва награда за спот на Меѓународниот фестивал за туристички филмови и спотови во Полска, и предизвика огромен меѓународен интерес, а има над половина милион посети на интернет линкови.

Погледнете го спотот: