HACCP систем

Стандардите на HACCP системот треба да ги применат сите евидентирани во Дирекцијата за храна: индустриски објекти за производство на храна, фурни, бурекчилници, слаткарници, занаетчиски производители на кори и кадаиф, кафулиња, пицерии, млечни ресторани, гостилници, продавници, супермаркети, маркети, ноќни клубови, дискотеки, магацини, транспортери на храна, сите мали земјоделци и фармери кои го продаваат своето производство, како и за зелените пазари.

Трошоците за воведување на системот најмногу зависат од големината на компанијата и што таа работи. Најголем трошок ќе имаат производните фирми. Најмала сума е 1.500 евра.

Со  HACCP се пропишуваат правилата како треба да изгледа работното место, од кои материјали да бидат направени објектите, како да бидат уредени просториите и какви алатки треба да се користат. Строги се правилата за влегување и излегување од објектите, за нивното одржување, дезинфекција и чистење, како и начинот на облекување на работниците. На пример, при влегување во погон за производство лицата треба да се избањаат и да носат посебна заштитна опрема. Рацете се мијат на посебни чешми, како оние хируршките. Објектите треба да бидат поставени со посебен материјал кој треба да одговара на дејноста, на пример ѕидовите во производствените погони треба да се од материјали кои се лесно чистливи, а опремата треба да биде поставена минимум половина метар од ѕидот.

За воведување на системот се потребни најмалку 4 месеци. Сертификатот се добива последниот месец, откако ќе се провери дали спроведениот систем функционира.

Според последниот податок кој излезе во јавноста, само 3% од фирмите го примениле. Ако се земе предвид дека во Дирекцијата се регистрирани 14.000 фирми од прехранбената индустрија, значи дека дури 13.550 сè уште работат по свои стандарди. Казните кои ги најави Дирекцијата се навистина високи. Според Законот за безбедност на храната, тие се движат од 80.000 до 240.000 денари или од 40.000 до 120.000 денари, во зависност од прекршокот и пломбирање на објектот.

Најголем проблем ќе имаат малите производители и малите дуќанџии, од каде и потекнуваат најголемите проблеми (пример е последното труење во слаткарницата Ринија).

ХАССП е и една од обврските кои Македонија ги презема за влез во ЕУ.  Обврска на сите фирми е да го воведат, а на оние кои извезуваат во Унијата и да обезбедат сертификат за тоа.

Успешен пример за воведување на ХАССП-системот кај новите членки на Унијата е Унгарија, каде што имплементацијата помогнала во развој на угостителството. Сигурноста дека јадат здрава и проверена храна ги привлекла австриските и германските бизнисмени.
Неуспешен пример е Бугарија, каде што се направени многу пропусти, главно поради лошиот консалтинг, што резултира со затварање на 1.800 од 2.800 фирми, голем удар за стопанството.