На прилепчанката Матија Сапунџиеска ѝ појде од рака да го направи тоа што е сон за многу фудбалски работници во Македонија – да стане дел од машинеријата на англискиот гигант Манчестер јунајтед, со тоа што ја доби лиценцата да организира групи на деца од нашата земја што би заминале на тренинг-камп во „Фудбалските училишта на Манчестер јунајтед“ (The Manchester United Soccer Schools).

Децата тренираат фудбал по теркот на Манчестер ј.

„Веруваме дека школата за англиски јазик и за тренирање фудбал во стилот на Манчестер ј. е единствената шанса за нашите деца да се доближат до овој феномен. Со тоа може да почувствуваат и се надеваме да им пренесат на сите оние што не ќе можат да си дозволат да станат дел од оваа школа, еден поинаков концепт на едукација и тренинг. Ова секако ќе биде голем предизвик за сите љубители на фудбалот што не познава граници“, вели Сапунџиеска.

„’Фудбалските училишта на Манчестер јунајтед’ е летна школа за фудбал и курсеви по англиски јазик, наменети за деца и младинци на возраст од 9 до 17 години. Летната школа е организирана на следниот начин – наутро, секој ден се одржува фудбалски тренинг, реализиран од ’Фудбалските училишта’. Тренинзите имаат повеќекратна намена како работење на подобрување на техниката, тактики, физичка и ментална кондиција, социјален – тимски елемент од играта.

Матија Сапунџиеска

Тренингот се одвива во забавна и пријателска атмосфера, при што децата учат и градат спортски дух на релаксиран начин. Главни цели на школата се секоја личност да достигне оптимално ниво на перформанси и максимална корист од тренинзите реализирани на начинот на Јунајтед. Секое попладне се одржуваат курсевите по англиски јазик. Лекциите се реализираат според програми на Оксфорд јуниверзити прес. Во почетокот на курсот секој ученик прави тест по англиски со цел да се одреди нивото на познавање на јазикот во кое припаѓа“, објаснува Сапунџиеска, која по потекло е од Прилеп.

Таа додава и дека сето ова не значи дека децата што би биле дел од овој проект би имале сигурна шанса да се запознаат со ѕвездите на клубот.

„Не сакаме да има дезинформираност – ова не е академијата на Манчестер јунајтед и шансата да ги видат или да се запознаат со играчите е минимална, но во априлската група сите студенти на школата ќе присуствуваат на мечот на Манчестер јунајтед против Астон Вила“, вели Матија.

Сапунџиеска со своето семејство веќе осум години живее во Обединетото Кралство. Сите се големи навивачи на Јунајтед и неретко се на трибините на средбите што ги играат избраниците на сер Алекс Фергусон.

Во училиштата се учи англиски јазик

„Во Англија сум со семејството веќе осум години. Мојот сопруг ја прифати поканата од националниот здравствен сервис да работи како консултант-рендгенолог во Манчестер, во пакет со двегодишно обезбедено сместување и платено патување во Македонија два пати годишно. Редовни посетители сме на концерти, театри, филм и секако, како навивачи на Манчестер јунајтед – на фудбалските натпревари на Олд Трафорд“, вели Сапунџиеска.

Таа додава дека љубовта спрема фудбалот е зараза што ја добила од машката половина во семејството.

„Тие се страсни навивачи на Манчестер јунајтед. За мене клубот лично е предизвик и предмет на анализа од менаџерски и маркетиншки аспект. Фасцинирана сум од организацијата и одржувањето високо ниво мотивираност (како на играчите, така и на навивачите) и градење, односно одржување чувство на припадност. Не постои друг настан што без посебна промоција може да привлече, и тоа континуирано со години, преку седумдесет илјади посетители што не само што покажуваат интерес, туку и се борат да дојдат до карти. Како некој огромен магнет со голем радиус на магнетно поле да ги привлекува илјадниците посетители без разлика дали се страсни љубители на спортот, приврзаници на клубот, навивачи или едноставно сакаат да ја разбијат монотонијата на секојдневието. Неретко ги возам до Олд Трафорд, и синот и сопругот, па враќајќи се од стадионот се движам обратно од „текот“ на реките од луѓе што од сите страни се движат спрема центарот на случувањето Олд Трафорд“, завршува Сапунџиеска, која веројатно е првата Македонка што на кој било начин успеала да има врска со славниот англиски клуб.