Изградба на црква на плоштад Македонија?

Замислено е Црквата да биде спој на совремието и традиционалноста, во корелација со сите околни поединечни споменици на културата, и да ги задоволува сите православни сакрални канони и функционални потреби на еден сакрален објект

Распишан е конк*рсот за избор на идејно решение за градење на Православен храм на плоштадот "Македонија" во Скопје.
Во конк*рсот, покрај другото, стои дека треба да се решат уличните визури од сите страни на плоштадот со посебен акцент и во склад со визурата од културното добро Камен Мост, поради визуелниот контакт со другата страна на реката на Вардар.

Освен тоа, проектот треба да дозволи современ архитектонски израз и употреба на традиционални материјали, како и да се задоволени сите православни сакрални канони и функционални потреби на еден сакрален објект. Внимание треба да се обрне и на формата, која треба да е произлезена од влијанијата на традиционалниот контекст. Проектот треба да биде во контекст со заштитеното централно градско подрачје и во корелација со сите околни поединечни споменици на културата, а треба да подразбира и традиционалност, оригиналност и иновативност...

Право на учество имаат и домашни и странски компании и физички лица.

Ќе бидат доделени три награди, од кои првата ќе изнесува 400.000,00, а втората и третата по 250.000,00 и 150.000,00 денари. Ќе се реализираат и два откупа, вредни по 30.000,00 денари.
Крајниот рок на доставување на проектите е 24 март, во Архива на Министерство за култура.

ВАКВА ИДЕЈА НЕ Е НИШТО НОВО
Според неодамнешна изјава на владиниот портпарол Ивица Боцевски, идејата за ваков Храм не е ништо ново ни во пошироки рамки, бидејќи во речиси сите европски метрополи постојат цркви на плоштадите.
За да се реализира идејата, која потекна од премиерот Никола Груевски, а која е одобрена со Одлука на Владата, најверојатно ќе треба да се измени деталниот урбанистички план.