Нападнато полициско возило-одмазда Бродец

30 дена притвор за Беќим Дардишта, притвор во отсуство и за Харун Алиу и за возачот на „опел вектрата“ од која беше пукано во џипот на специјалците во јануари годинава.

Обвинителот и истражниот судија синоќа ја прошириле пријавата за уште еден. Кривично ќе одговара и Мифтар Ислами, скопјанецот кој беше уапсен истата ноќ со Дардишта. И тој имал сознанија за организирањето на нападот на полицискиот џип.

„Лицето се товари за истите дела, како и останатите. Од страна на истражниот судија, според информациите со коишто досега располагам, изречена е мерка притвор за две од досега приведените лице“, рече Иво Котевски портпарол на МВР

Со апсењето на Исмаил Аќеми, во чиј дом беше најден голем арсенал оружје, полицијата расветли дека убиството на припадникот на Тигрите, Зоран Марковски, е смислено и организирано. Како мотив за убиството притворените ја спомнале одмаздата за акцијата во Бродец.

Во Марковски пукал Исмаил Аќеми, а нарачател на убиството бил Хајрун Алиу, лидерот на Национална Алтернатива. Дел од логистиката бил и Дардишта.

Неговото апсење крена тензија во семејството. Неговиот брат два дена во седиштето на ДУИ, во скопски Чаир, го чекаше лидерот на партијата, да му помогне да го ослободи брат му.

„Со недели нема да излеземе од ДУИ, се додека не дојдат тие тука“, рече вчера братот на Дардишта.

Денеска пред седиштето на ДУИ беше мирно. Од партијата велат „ја изменаџирале работата“ со семејството на Дардишта.