Одбојка

НАЧИНОТ НА КОЈ Е ИЗВРШЕН ИЗБОРОТ НА ЖЕНСКАТА КАДАТСКА РЕПРЕЗЕНТАЦИЈА ЗА БП ВО ГРЦИЈА ПОСТАВУВА НИЗА ПРАШАЊА КОИ ЗАСЛУЖУВААТ ОДГОВОР

Селекцијата - резултат на притисоци!?

Меѓународните настапи на нашите национални селекции, независно за кој спорт станува збор, се чини не можат да минат без проблеми, некаде помали некаде поголеми. Последен таков случај е нашата женска кадетска репрезентација во одбојка која од вчера се наоѓа во Грција каде ќе настапи во рамките на БП во Портарија, близу Волос.

Проблемот е лоциран во начинот на кој се одредени патниците, во 5 мин до 12 часот. Ваквиот стил на работа, кој за некои е неправилен, внесе револт кај многумина, особено кај дел од родителите чии деца беа повикани на подготовките, ги одработија тренинзите, ги завршија сите формалности, па дури и пасошите им беа визирани.

Еден од неколкумината е и Александар Царчев, поранешен ракометар, родител на Андреа Царчева, членка на Вардар, која во последен момент ненадејно беше елиминирана од националната селекција.

"Мојата реакција не сакам да се свати како реакција на загрижен родител, далеку од тоа. До сега ниту еднаш во животот, иако сум спортска личнот, не сум го користел или злоупотребил мојот афторитет моето има и презиме за цели кои не се својствени за спортистите. Меѓу тоа ова што се направи со децата ги помина сите граници. Најмногу е виновен селекторот Жабев. Преку разни канали дознав дека мојата ќерка нема да патува во Грција иако до последен момент сметаа на неа. Ако тоа требало да биде така има начин како тоа треба да се стори, предвреме, како што тоа го прават сите селектори кои држат до себе, кои се селектори во вистинската смила на зборот. Не тебаше да ја планираат ниту за подготовките или пак јасно да стават до знаење дека е потребна само за подготвителната фаза. Откако ја дознав веста имав средба со Жабев кој ја прифати критиката, призна дека Андреа заслужува да го носи дресот со државен грб. Патем добив впечаток дека е немоќен да се справи со притисоците кои му се вршени последните денови. Токму тоа ме натера и да реагирам, да поставам прашање - До кога селекциите ќе се составуваат под притисок, до кога во националните репрезентации ќе партиципираат спортисти чии родители 'плаќаат' имаат врски, ги туркаат децата, или селекторите се уценуваат? Ќе има ли крај? Се додека така се работи Македонија, на спортски план, ќе назадува. Резултатите ќе дојдат само тогаш кога стручните штабови ќе бидат независни, кога нема да подлегнуваат на притисоците. Дали Жабев е свесен какви трауми претрпуваат овие деца кои се на возраст од 15 - 16 години, возраст која сама по себе е осетлива, деца кои неможат да сватат дека се изиграни, деца кои можеби за прв пат ја почувствуваа неправдата, деца кои на одреден начин се измамени. Жабев ќе биде истиот и кога ќе се врати од Грција, но Жабев нема да биде истиот во очите на децата. За нив секогаш ќе биде човекот кој нечесно ги елиминирал од репрезентацијата. Жабев како селектор денес е утре нема да биде, што значи тоа е менлива категорија, а спортистите се спортисти целиот живот. Токму ваквиот стил на работа многу деца ги натерало да се откажат од најубавото нешто во животот - од спортот. Едно можам да ветам. Ова вака нема да зарши. Ќе се борам со сите сили, со сите средства, во името на сите деца кои на ваков или друг начин ја почувствувале неправдата. Ќе се борам да го елиминирам најголемото зло во спортот - притисоците, корупцијата, уцените, пријателствата. Дресот со државне грб ќе го носат само тие кои во моментот го заслужуваат, најдобрите."

ПЕТАР ЖАБЕВ - СЕЛЕКТОР

Ова се најдобрите!

Одговор на обвинувањата даде лично селекторот Жабев, пред заминување за Грција, кој потврди дека имал средба со Царчев.

"Точно е дека конечниот состав на нашата селекција, која учествува на БП во Грција го дефинирав пред еден ден. Јас имам свои методи на одлучување, впрочем одговорноста како селектор е моја. Сметам дека тие кои се најдоа на списокот во моментов се најподготвените. Имавме само 7 тренинзи што е премалку за добивање на комплетна слика за играчите. Главни критериуми беа финалните натпревари од Купот на Македонија за пионерки и за кадетки. Сите натпревари ги следев кои ми помогнаа да создадам слика за секој играч поединечно. Тоа не значи дека Царчева нема да се најде во кој друг состав, за некое следно натпреварување. Точно е тоа дека имавме заедничка средба со Царчев, средба која беше доста мачна, средба за која не би сакал да говорам. Ако ме обвинуваат зошто порано не сум го дефинирал списокот, одговорот е многу едноставен. Доколку направев такво нешто залагањето на тренинзите кај дел од играчите ќе се сведеше на нула. Такво нешто од спортски аспект во фаза на подготовки не е препорачливо. Токму од тие прични сите беа во неизвесност, до последен момент, кога го соопштив конечнот список на патници", рече Жабев, како одговор на обвинувањата на Царчев.

ОФМ ДО КРАЈОТ НА НЕДЕЛАТА ТРЕБА ДА ГИ ПРЕЦИЗИРА ДАТУМИТЕ ЗА СТАРТ НА ПОДГОТОВКИТЕ НА МЛАДИНСКИТЕ СЕЛЕКЦИИ ЗА БАЛКАНИЈАДИТЕ

Кадетските репрезентации во исчекување

* Поради финансиските преоптоварувања на Федерацијата за сениорската машка репрезентација, челниците на ОФМ се во потрага по најекономичниот начин со кој ќе ги спроведат Балканијадите.

Раководството на Одбојкарската федерација на Македонија даде зелено светло за настап на сите четири младински репрезентации на балканските шампионати годинава, но и покрај тоа се соочува со проблем, односно е во потрага по најекономичен начин со кој ќе може да се овозможат овие натпреварувања, а притоа да не се преоптовари дополнително буџетот на Федерацијата. Оттаму произлезе и идејата во зависност од тоа од кој град ќе има најмногу репрезентативци таму да се одржат и седумдневните подготовки за Балканијадите. Селекторите на кадетската машка и женска репрезентација, Деан Стојанов и Петар Жабев, веќе ги доставија пошироките списоци на одбојкари и одбојкарки до канцеларијата на ОФМ со цел да ја олеснат работата, а според доставеното најмногу играчи има од Скопје, што би значело дека и темпирањето на формата на двете екипи би требало да се одржи во главниот град. Сепак, првите луѓе на ОФМ се уште го немаат одредено стартот на подготовките и на селекциите кој би требало да биде во текот на следната недела бидејќи кадетките веќе на 21 јули треба да заминат за Грција, додека кадетите пет дена подоцна настапуваат во Бугарија.

"Според составите на репрезентациите подготовките на двете кадетски селекции би требало да се одржат во Скопје. Федерацијата се труди да го пронајде најекономичниот начин преку кој ќе се спроведат подготовките и настапите на Балканијадите, па поради тоа с$ уште не е определен датумот кога ќе стартуваат селекциите со темпирањето на формата. Ова прашање ќе биде решено до почетокот на следната недела бидејќи сме свесни за кусиот временски период со кој располагаме и кој налага што побрзо да се донесат конкретни одговори", изјави директорот на репрезентациите, Петар Јовановски.

Селекторите во неизвесност го очекуваат почетокот на подготвителниот период и размислуваат за промени во составите на репрезентациите за да може најрационално да го искористат кусото време за воигрување на екипите.

"Со оглед на околностите во кои се наоѓаме, можно е да ги одработиме подготовките само со дванаесет играчи кои би влегле на конечниот список бидејќи така најдобро би се воиграла екипата и кусото време би било најрационално искористено. Нашите обврски да доставиме поширок список на играчи и програма за работа се завршени, сега се чека на челниците на ОФМ да кажат кога ќе стартуваме", вели селекторот на кадетската машка репрезентација, Деан Стојанов.

Кадетките од 22 до 26 јули во Портариа, Грција, ќе настапат на Балканијадата, додека кадетите од 26 до 30 јули играат во Казанлак, Бугарија.

В. Зарева

Познат распоредот за кадетките и младинците

Балканската одбојкарска асоцијација вчера го објави редоследот на одигрување на натпреварите по групи на Балканскиот шампионат за кадетки кој од 22 до 26 се игра во Портариа, Грција, како и за Балканијадата во машка младинска категорија, која се игра од 13 до 17 август во Корча, Албанија.

Кадетките ќе го отворат годинешното натпреварување, каде во рамките од групата "А" за прв противник ја имаат Турција, а потоа се среќаваат со Романија, додека последниот ден од разигрувањето по групи сме слободни.

Младинците играат во групата "Ц" каде на стартот за противник ја имаат селекцијата на Србија, потоа се среќаваат со Албанија, а последна екипа со која ќе ги измериме силите во групата е БиХ.

Трите првопласирани екипи во групите, како и најдобро второпласираниот состав ќе играат во полуфиналето, додека останатите селекции ќе се борат за подобар пласман.

Најлоша организација на младинските првенства

Тренерската организација при ОФМ на состанокот пред два дена ја оцени оваа сезона во младинските првенства како најлошо организирана. Причината за ваквиот заклучок произлегува од заминувањето од функцијата на комесарот за натпреварување, Мирко Трајков, по што беше направена пауза во шампионатите, па дури беше ставено и под знак прашалник комплетирањето на натпреварувањето. Потоа следуваше набиен распоред на турнирите во сите категории, за на крај да се добијат победниците во сите конк*ренции.

ПО ЕДНА ГОДИНА НАСТАП ВО СРПСКОТО ПРВЕНСТВО РЕПРЕЗЕНТАТИВНОТО ЛИБЕРО ПОВТОРНО ДОМА

Тања Алексовска им се враќа на "шпедитерките"

ОВАА ГОДИНА ПОВТОРНО "BEACHVOLLEYBALL OHRID 2008"

Одбојка на плажа - третпат

Од 17 до 27 јули, на плажата Бафало во Охрид ќе се одржи третото по ред издание на првенството во одбојка на песок, во организација на Промо дизајн и Евент менаџмент компанијата.

Како изминатите две години така и оваа турнирот е поделен во неколку категории, аматери, компании, јавни личности, а најголемото внимание и акцентот е ставен во завршната фаза од настапот каде се натпреваруваат професионалците.

Минатата година во машка конк*ренција шампиони беа Гоце Славков и интернационалецот Христо Модев, кои потврдија дека оваа година ќе се потрудат да ја одбранат титулата, додека кај дамите Сандра Ѓошева и Софка Камиловска се закитија со втората титула како најдобра екипа на првенството во одбојка на плажа.

Овој настан од година во година привлекува с$ поголемо внимание, па поради тоа организаторите се надеваат дека и летово ќе бидеме сведоци на уште еден квалитетен турнир.

НОВИ МОМЕНТИ ВО ПЛАНОВИТЕ ЗА ПОДГОТОВКИТЕ НА МАШКАТА РЕПРЕЗЕНТАЦИЈА ЗА БАРАЖОТ

Сениорите на Копаоник!?

*Машката репрезентација има покана од словенечката селекција заедно да го одработат подготвителниот период пред бараж натпреварите кои двете екипи ги играат на стартот на септември.

Стручниот штаб и раководството задолжени за машката сениорска репрезентација се во преговори со првите луѓе на словенечката селекција за одржување на заеднички подготовки на Копаоник од 20 до 30 август, во пресрет на одигрувањето на баражот за Европското првенство 2009 во Турција, каде Македонија игра со Чешка, додека Словенија се среќава со Португалија. Во предвидениот период на Копаоник подготовки за новата натпреварувачка сезона ќе има и рускиот шампион Искра Одинцово, што ќе претставува одлична можност да се одиграат и неколку меѓусебни пријателски натпревари, што ќе биде од заемна корист за сите три екипи.

"Имаме покана од репрезентацијата на Словенија заедно да одработиме десетдневни подготовки на Копаоник од 20 до 30 август, така што меѓусебно ќе си помогнеме во темпирањето на формата пред почетокот на двомеч баражот за ЕП во кој ние се среќаваме со Чешка, додека Словенија за свој противник ја има Португалија. Во истиот период на Копаоник рускиот прволигаш Искра Одинцово ќе се подготвува за новата сезона, што претставува уште еден позитивен момент. Ќе може да одиграме неколку контроли со двете екипи, што секако дека ќе биде од заемна корист. Одговорот за оваа примамлива понуда ќе го дадеме по состанокот на Извршниот одбор кој ќе треба да ја утврди финансиската поддршка за репрезантацијата во следниот период", не информираше спортскиот директор на репрезентациите, Петар Јовановски.

Засега останува првичниот план, репрезентативците да се соберат на 5 август, а понатамошниот тек на подготовките дополнително ќе биде познат.



Чесите во исчекување

Чешката федерација ќе мора да го почека одговорот на ОФМ за барањето за промена на терминот на првиот бараж натпревар.

"Се уште немаме одговорено на барањето на Чесите. Ги разгледуваме сите опции и нормално и ние поставуваме одредени услови бидејќи примарно е пред с$ да ги гледаме нашите интереси", вели Јовановски.

Чешка побара првиот дуел кој треба да се игра на 6 септември да биде поместен за 9, поради поклопување на термини на два настани.