Прекари на тимовите

ТОП 5 ПРЕКАРИ НА КЛУБОВИ

Кога по авионската несреќа во 1958 година Мат Базби беше принуден да вклучи млади играчи во тимот, Манчестер јунајтед засекогаш останаа "бебиња". Некои се уште ги викаат фудбалерите на Атлетико Мадрид "јорганџии", што влече историја од бојата на нивните стари дресови и токму дизајнот на опремата е најчестата инспирација за прекарите на клубови, па така имаме "нераѕури", "ле блез", "редс"... "Вест" ги избра петте најинтересни прекари на македонски спортски клубови.

1. Кенгури

Ова животно не е карактеристично за струмичкото поднебје, но некако се нашло на грбот на фудбалскиот второлигаш Беласица. Имено, со него струмичани овековечија една своја, не така дамнешна, импресивна резултатска серија, со која се прошетаа до пласманот во Првата лига. Тоа меѓу струмичани остана запаметено како "кенгурски скок".

2. Штркови

Како клуб кој своевремено беше под "Металски завод Тито", на кошаркарскиот прволигаш од Аеродром многу повеќе му прилега прекарот "металци". Но, место работнички елементи, симбол на екипата е еден штрк. Тој беше вклучен во логото на МЗТ пред десетина години, во периодот кога клубот беше спонзориран од Орце Камчев и наскоро беше прифатен и од медиумите.

3. Гипсари

Цементарци, гипсари... некој би помислил дека македонскиот фудбал е едно големо градилиште. Гипсари, всушност, се фудбалерите на актуелниот шампион Ренова. Тимот од Џепчиште е финансиран од Кенан Идризи, кој, пак, е сопственик на истоимената компанија за градежни материјали, па ваквиот прекар некако природно му се наметна на клубот.

4. Штофари

Фудбалскиот прволигаш Тетекс е уште еден клуб кој својата слава ја должи на индустриски гигант, во случајов на текстилниот комбинат од Тетово. Хрватски Вартекс беше познат како текстилци, додека оние што го носат дресот на Тетекс и денес ги именуваат штофари, иако клубот веќе не е под финансиската капа на најпознатата тетовска фабрика.

5. Црвено-црни

Класичен пример како една екипа може да стане препознатлива благодарение на своите клупски бои и обратно. Во Италија, таа е својствена за Милан или популарните "росонери", а во македонскиот спорт, црвено-црната комбинација е резервирана за опремата на сите екипи на Вардар.