Вести

Готово е! Озил потпиша за Реал

Германскиот репрезентативец Месут Озил е нов член на Реал Мадрид. Оваа вест беше потврдена и на официјалната интернет страница на Кралскиот клуб, а многу бргу ја пренесоа сите светски медиуми. Како бомба одекна новиот трансфер на Реал, кој иако со мака, сепак, успеа да се договори со Вердер и конечно го обезбеди шестото засилување на Сантјаго Бернабе ова лето по Педро Леон, Сами Кедира, Анхел ди Мариа, Серхио Каналес и Рикардо Карваљо.

Деталите околу трансферот не се официјално објавени, меѓутоа шпанските весници АС и Марка соопштуваат дека талентираниот 21-годишен фудбалер потпишал договор на шест години, а Вердер ќе инкасира 15 милиони евра.

"Неговата контрола врз топката е единствена, има техника на која тешко може да се парира, а асистенциите му се 'убиствени' и претставува една од најсјајните фудбалски ѕвезди кои доаѓаат во светскиот фудбал", стои на интернет страницата на "Кралевите".

Во понеделникот Реал беше во трка со време бидејќи Вердер имаше намера да го пушти во игра за плеј-оф дуелот за влез во Лигата на шампионите со Сампдорија в среда, а во случај Озил да настапеше тогаш трансферот ќе пропаднеше бидејќи во тој случај Германецот немаше да има право сезонава да настапува за Кралскиот клуб во европското елитно натпреварување.

Следеа вистински натегања кои повеќе наликуваа на психолошка војна. Вердер бараше повеќе пари, Озил инсистираше за трансфер, "Кралевите" размислуваа дали да се откажат и да почекаат на следната сезона кога неговиот договор со Вердер ќе истече па да го придобијат без пари. Сепак, Флорентино Перез направи храбар потег и во последниот обид успеа да го наговори Алофс да се ослободи од својот најдобар фудбалер.

Озил денеска треба да слета во Мадрид на задолжителните лекарски прегледи и официјализирање на соработката, а воедно и презентиран пред јавноста.

Младиот фудбалер ја почна својата професионална фудбалска кариера во Шалке каде играше две години пред да биде забележан од скаутите на Вердер кои го ангажираа за 4,3 милиони евра. Во Бремен ги прикажа најдобрите партии со што минатата година доби повик во германската репрезентација. Дебитираше на дуелот со Норвешка на 11 февруари 2009, а досега забележа 17 натпревари и два погодоци. Првиот гол го постигна во третиот настап за националниот тим, против Јужна Африка, а вториот на Светското првенство ова лето против Гана во триумфот од 1:0.


ЛИЧНА КАРТА

Име и презиме: Месут Озил.

Дата на раѓање: 15.10.1988.

Место: Гелзенкирхен (Германија).

ИГРАЧКА КАРИЕРА

2006 - 2008 Шалке

2008 - 2010 Вердер

2010 - ? Реал М.

РЕПРЕЗЕНТАЦИЈА

2006 - 2007 Германија У19

2007 - 2009 Германија У21

2009 - ? Германија

Трансферот на Германецот значи "шут-карта" за Ван дер Варт

Реал Мадрид се соочи со преголем број играчи во средниот ред, особено на позицијата на која игра Озил, што значи дека некој од играчите ќе биде продаден или даден под наем. Изборот падна на холандскиот репрезентативец Рафаел ван дер Варт, кој и покрај желбата да игра ќе мора да се помири со фактот дека ќе си замине. Шпанскиот весник АС тврди дека тренерот Жозе Мурињо веќе разговарал со Холанѓанецот и му ја соопштил оваа непопуларна вест. Со оглед на реномето кое го има Ван дер Варт не би било проблем да се најде нов клуб за него.