Македонците во Европа се подобри

Голем дел од македонските кошаркари веќе играат важна улога во своите екипи низ Европа. Тоа особено се однесува за репрезентативците кои беа фантастични последниот викенд. Победи остварија Олимпијакос на Антиќ, Литвос Ритас на Самарџиски, Лукоил Академик на Дамјан Стојановски, а во одлично светло се покажа Војдан Стојановски, кој, сепак, самиот не можеше да го спречи новиот пораз на Черкаси.

ГРЦИЈА - 2. КОЛО

Перо Антиќ се подобро се вклопува во играта на Олимпијакос. Добро е позната неговата игра во одбраната, но во грчкото првенство капитенот на нашата репрезентација одлично се снаоѓа и во нападот. На вчерашниот меч против Маруси, Антиќ на теренот помина само околу 15 минути, но и тоа му беше доволно да постигне 12 поени (5/7 за два, 0/2 за три поени, 2/3 слободни фрлања), четири скока, една асистенција и една украдена топка. Олимпијакос го победи Маруси со 92:63 и по две кола од првенството има исто толку победи.

БАЛТИЧКА ЛИГА - 4. КОЛО

Предраг Самарџиски Со Литвос Ритас беше уште поефективен од својот репрезентативен колега. На гостувањето кај Јенисеј во четвртото коло од Балтичката лига, македонскиот центар одигра 18 минути и реализира 14 поени (7/9 за два поени, 0/1 од линијата за слободни фрлања) со четири скока и една асистенција. Литвос Ритас славеше со 82:75 и се израмни со ЦСКА и Азовмаш на делба на второто место во својата група.

БУГАРИЈА - 3. КОЛО

Дамјан Стојановски помина само десет минути на теренот во дуелот на Лукоил Академик во дербито против Рилски Спортист, па поради тоа заврши со само два поена (0/1 за два, 0/2 за три поени и 2/2 за слободни фрлања) плус два скока и една украдена топка. Сепак, Академик славеше со 82:71 и го задржа првото место на табелата без пораз.

Во бугарското првенство свои настапи имаа уште Златко Гоцевски со Јамбол и Кирил Павловски со Черноморец, но двајцата претрпеа пораз. Гоцевски немаше поени во поразот од Черно Море со 72:62, додека Павловски реализира десет поени (4/11 за два поени, 2/3 за слободни фрлања) со седум скока и една асистенција за 37 минути на теренот во поразот од Спартак Плевен со 91:79.

УКРАИНА - 6. КОЛО

Черкаски Мавпи останаа на претпоследното место во украинското првенство откако во шестото коло го претрпеа и петтиот пораз, овој пат од Доњецк со 96:74. Сепак, Војдан Стојановски повторно беше најдобар во својата екипа со 14 поени (4/7 за два, 1/3 за три поени, 5/10 за слободни фрлања) за речиси 34 минути на теренот, плус три скока, три асистенции и една украдена топка.

Пораз во петтото коло доживеа уште Политехника Галичина и тоа со 88:81 од Азвомаш, но Ненад Зивчевиќ не се појави во својот тим.