Пикантна плескавица

Потребно:

800 г мелено јунешко месо
3 главици кромид
3 лути пиперки
2 чешниња лук
масло
сол
бибер
зачинал

Приготвување: ситно исечкајте го кромидот, измешајте го со меленото месо, па зачинете со сол, бибер и со зачинал. Обликувајте плескавици од месото и печете ги на скара (или тефлонско тавче без масло) од двете страни. Во меѓувреме, измијте ги лутите пиперки, исечете ги на поголеми парчиња и испржете ги во загреано масло. Пред крај, додајте го ситно сечканиот лук. Прелијте ги готовите плескавици со пржените лути пиперки и послужете ги.

Пирошки од батаци

Потребни состојки:

· пилешки батаци
· шунка со Знак за квалитет
· кашкавал со Знак за квалитет
· кисели краставички
· брашно
· 2 јајца
· презла
· лимон
· 1 лажица сенф
· лук
· ореви
· магдонос
· мајонез

Начин на приготвување:

Најпрвин од пилешките батаци се вадат кожата и коските. Потоа се солат и се чукаат како за шницли. На секое парче шницла се става парче долгнавеста шунка, 1 парче кашкавал и кисела краставичка. Се витка во ролат, се става во брашно со сол, потоа се натопува во матено јајце и на крај се валка во презла и се пржи во врел зејтин 10 мин.
Се служи со пире и сос, а одозгора се ставаат лимон исечен на кругови и магдонос.


Сос: 1 лажица сенф, жолчка од варено јајце, 1 ситно сечкана краставичка, лук, малку сечкани ореви, магдонос и мајонез.



Изменето од Valerija - 15.Февруари.2014 во 16:59

Праз со компири

Потребно:

* 600 г варени компири
* 2-3 лажици путер
* 100 г чадена сланина
* 1 главица кромид
* 1 страк праз
* сол
* бибер
* 1 китка магдонос

Приготвување: излупете ги варените компири, па ситно исечете ги или крупно изрендајте ги. Загрејте го путерот во поголемо тавче. Исечете ја сланината на коцкички, па кратко пропржете ја во врелиот путер. Додајте ги сечканите компири и пржете ги на тивок оган 10-ина минути. Исчистете го кромидот, па ситно исечкајте го. Измијте го празот, исчистете го, исечете го на лентички, па додајте го заедно со кромидот во компирите и кратко пропржете го сето тоа. Зачинете го јадењето со сол и со бибер, а потоа поклопете го тавчето, па варете го шест-осум минути. На крај, посипете ги пржените компири со ситно сечкан магдонос.

Рибарски сендвич

Потребно:

* 500 г сардини
* 5 филети солени рипчиња
* 3 лажици брашно
* 400 г леб
* листови од зелена салата
* 1 главица кромид
* 1 домат
* магдонос
* масло

Приготвување: во секоја од исчистените сардини, во утробата ставете по половина парче од солените рипчиња, притиснете ги со прсти, испрпелкајте ги во брашно, па пржете ги во загреано масло 5-10 минути. Лебот исечете го на парчиња, отстранете ја корката, па пропржете го во загреано масло од едната страна. На пржената страна од лебот ставете лист од зелената салата, неколку пржени риби, домат и кромид исечени на тркалца, па преклопете го со друго парче леб.

Елбасан (јагнешка) тава

(За четворица)

Јагнешки бут
4 јајца
1 овчо кисело млеко
сол
Подготовка:
Прво посолете го месото. Во тавата во која ќе се пече јадењето загрејте малку масло и потпржете го месото од двете страни. Потоа во тавчето ставете малку вода, покријте го со фолија или со капак, и ставете го да се пече, прво на појако, а кога ќе се загрее рерната намалете ја температурата на 180 степени. Одвреме-навреме додавајте вода и превртувајте го месото. Во зависност од големината на парчето месо, тоа може да трае 1 - 2 часа. Кога месото ќе омекне, оставете го без капак да се зарумени и да испари водата. Изматете ги јајцата со виљушка и додадете им го киселото млеко и малку сол. Превртете го месото, истурете ја смесата околу него, па вратете го тавчето во рерна уште 15-ина минути додека јајцата не се потстврднат и не се заруменат на површината. Елбасан тавата одлично оди со печени компири и со зелена салата со краставица, млад кромид и 'рдокви, а, секако, и со младо лукче и со свежа лута пиперка.

Италијански грисини

Потребно:

* 1 пакетче свеж квасец
* 500 г брашно
* 40 г путер
* 1 лажичка сол

Приготвување: издробете го квасецет во 250 милилитри млака вода. Во длабок сад измешајте ги брашното, путерот, солта и стасаниот квасец. Замесете тесто и оставете го на топло место да стаса. Потоа, расучете го тестото во кора дебела половина сантиметар и исечете го на тенки ленти. Лентите валкајте ги на работната маса додека не станат цилиндрични како грисини, а потоа наредете ги во тавче обложено со масна хартија за печење. Загрејте ја рерната на 200 степени и оставете ги грисините во близина на рерната да отстојат 10-ина минути за да надојдат уште малку пред печењето. Грисините печете ги 10-ина минути.

Проја

Потребно:

* 500 г пченкарно брашно
* 1 лажица маст
* 1 јајце
* малку сол
* ладна вода

Приготвување: замесете ги брашното, јајцето, маста и солта со ладна вода, така што тестото ќе биде ретко, а не густо. Земете тавче, доволно големо, така што кога тестото ќе се разлее, ќе биде со дебелина од еден прст. Ставете го тестото во добро намастено тавче и печете го во рерна. Откако пројата ќе биде готова, тенка и со кора, премачкајте ја одозгора со малку маст.