Убаво деколте...

Големите гради пак се во мода

Денешната жена носи за еден број поголем градник од својата баба кога била на нејзини години, а главна причина за промена на телото е неправилниот начин на исхрана и недоволната физичка активност, проценуваат група британски научници, а оваа теза ја потврдуваат и македонските експерти

Современите жени имаат поголеми гради. Ова е последица на модерниот начин на живот кој најмногу се одразува врз женските гради. Денешната жена носи за еден број поголем градник од својата баба кога била на нејзини години, проценуваат група британски научници. Според нив, деколтето на модерните жени и на оние пред педесет години драстично се разликуваат, односно земено во просек, женските гради пораснале за цел број.
Главни причини за промена на телото се неправилниот начин на исхрана и недоволната физичка активност.
Британските научници тврдат дека денес жените дневно трошат многу малку калории работејќи во кујна, за разлика од жените во минатото кои топеле и по 1.000 калории само додека миеле садови или переле алишта на раце. Сега таа работа ја вршат машините за садови, за алишта, правосмукалките и други апарати.
Од друга страна пак, стои во истражувањето, современите жени јадат и пијат многу повеќе. Во последните пет децении двојно е зголемено внесувањето на масти, шеќери и алкохол, додека исто толку е намалено јадењето овошје и зеленчук.
Оваа теза ја потврдуваат и нашите стручњаци.
Доктор Митко Караѓозов од Торакална хирургија вели дека во последните години сè поголем е бројот на девојчиња на возраст до десет години кои имаат развиени жлездени ткива, а веќе на 14 години имаат оформени дојки со сите атрибути.
"Денешните деца хормонално созреваат прерано, односно многу рано влегуваат во пубертет. Тоа е последица на неквалитетна исхрана, односно храна полна со хормони, но и физичка неактивност. Па така, имаме девојчиња во пубертет со гради кои по форма, големина и конзистенција не им личат на годините. На тој начин се поместуваат и границите за појава на тумор на дојка. Ако порано доаѓаа пациентки на возраст од 50 години со тумор на дојка, а ние ги жалевме оти се премлади за ваква болест, сега тумори нè не изненадуваат и кај 16 годишни пациентки", вели Караѓозов.
Според него, бујните гради на денешниве девојки се многу помалку атрактивни од градите на бабите, кои се хранат здраво и работат многу.
"Македонките изгледаат фантастично кога ќе ги видите на улица. Носат убава гардероба, се шминкаат со квалитетна козметика, па уште ако имаат и природна убавина, се совршени. Но, така е додека да ги соблечете голи. Кога ќе ги видиш на плажа во Охрид, со целулит и растресени гради ќе се исплашиш. Бабите имаат поубави гради, со поздрав изглед од нив", тврди Караѓозов.
Болестите на гради како резултат на лошата исхрана, се далеку поголем проблем од нивната големина и изглед, сметаат нутриционистите.
Исхраната кај жената, објаснуваат тие, е директно поврзана со хормонските влијанија врз ткивата и врз организмот.
"Јадењето масна храна од животинско потекло, многу млеко и млечни производи кај децата од мали нозе води до прерано растење на градите. Но, се случуваат и други несакани последици кои влијаат врз совршениот баланс на телото. Современите жени ја сведуваат на минимум растителната храна, па освен промена на градите, трпат и психолошки промени, а се соочуваат и со болен менструален циклус, зголемена телесна тежина, чести инфекции на гениталиите, многу често и болен сексуален однос", вели Јадранка Бибан, гинеколог-акушер, која современите хронични болести кај жената ги лекува со здрава храна.
И за Бибан преголемите гради не се атрактивни. Таа смета дека пластичната револуција која сега се случува во светот, е всушност една подготовка за прифаќање на ваквиот изглед кај жените кој го наметна современиот живот.
"Кога ќе ги видат девојчињата колку се развиени, многу жени добиваат желба и тие да имаат такви гради, па се одлучуваат на силикони. Едноставно се создава конк*ренција. Но, јас мислам дека секоја жена треба да ја задржи индивидуалноста, да живее здраво, а така ќе биде и атрактивна. Во здраво тело, здрав дух, а тоа ќе се постигне со правилна исхрана и физичка активност", вели Бибан.
Големите гради пак се во мода. Особено кај жените. Ова е светски познатата, вонвременска изрека на српскиот афористичар Душан Радовиќ, која денес е реалност. Дека навистина е така говори и фактот што во последните дваесет години на модни писти се појавуваа преслаби девојки, со спласнати деколтеа, а сега речиси и да нема успешна манекенка без големи гради.
Но, тоа не значи, предупредуваат дизајнерите, девојките да се растрчаат да купат градници со два пати поголем број од нивниот, само за да бидат во тренд.

Тресете ги градите три пати неделно

Вежбите го обликуваат телото. За цврсти гради се препорачува вежбање аеробик, барем три пати неделно, трчање за нивно протресување и пиење многу течности.
"Нашето тело е создадено за движење, а не за мирување. Физички активниот организам биолошки е помлад од неактивниот за 10 до 15 години. Ако не спортуваме, повеќе од сигурно е дека ќе ни се промени телото и ќе ни се загрози нашиот естетски изглед. Погрешен стил на живот може да предизвикаат промена на коските и мускулите, зголемен крвен притисок, дијабетис, болести на срцето и други сериозни заболувања ", вели Славица Новачевска, универзитетски професор по физичко.