Тројца изрешетани до смрт во Скопје

Долгови мотив за свирепото убиство

Дека Тони Денковски бил решен да го изврши убиството и да се соочи со законот говори фактот што откако ладнокрвно ги убил тројцата тој ја оставил пушката и си заминал, а вчера изутрината сам се предал во полициска станица

Велешаните Јордан Јорданов-’Ркулот (37) и Влатко Андреевски (26) и полицаецот Владо Милошев (36) од Скопје завчера беа ладнокрвно убиени во вооружен напад во преполна пржилница за риба во трговскиот центар „Три бисери“, во скопската населба Аеродром. Во нив од калашников пукал Тони Денковски (47) од Скопје, сопственик на магацин и на кабелска телевизија.

Денковски пред истражните органи изјавил дека мотив за нападот биле долгови во односите со Јорданов, кој е познат криминалец од Велес, осомничен дека е член на таканаречената Франкфурт наркомафија. Убиецот не можел да го трпи секојдневниот притисокот од Јорданов, кој му се заканувал, па одлучил да му пресуди.

Очевидци велат дека ‘Ркулот, Андреевски и Милошев со уште една девојка околу 19.40 часот седеле на маса во ресторанот „Биг фиш“, а во непосредна близина бил и Денковски. Во еден момент тој излегол од ресторанот, но се вратил по кратко време, овој пат вооружен со автоматска пушка скриена во темна вреќа.

- Беше страшно. Се слушна рафален истрел во преполниот ресторан. Сите се развикаа, а луѓето бегаа од страв. Се' се случи за кратко време и луѓето беа избезумени - вели очевидец.

Дека Денковски бил решен да го стори убиството и да се соочи со законот говори фактот што откако ладнокрвно ги убил тројцата, ја оставил пушката и си заминал, а вчера изутрината сам се предал во полициска станица.

СТАРО ПОЗНАНСТВО

По нападот Јорданов починал на самото место, а Милошев и Андреевски со тешки повреди биле однесени во Ургентниот центар во Скопје.

- Во Ургентниот центар беа донесени две лица со прострелни рани. Едниот од нив веднаш им подлегнал на повредите, а другиот починал во операционата сала. Имал прострелни рани во главата и градниот кош - изјави Реџеп Селмани, директор на Ургентниот центар.

Веднаш по крвавиот напад на местото пристигнаа десетици полицајци, а се насобраа и стотици граѓани. Екипите на крим-техника ги обележуваше доказите, ја зеде пушката за вештачење, собираа фрагменти од проектили, к*ршуми, мобилни телефони, траги од крв, а за тоа време полицијата ги испрашуваше сведоците. На местото се појавија и неколку патроли од полициската единица „Алфи“. Полициски патроли беа поставени на сите излези од Скопје и се претресуваа сите возила во обид да се уапси напаѓачот.

- Според неговото признание, станува збор за должничко-доверителски односи меѓу него и еден од убиените. Нивното познанство датирало од порано и тие повеќепати влегувале во такви односи, кои не биле расчистени и како револт, според неговото кажување, за притисоците што биле вршени врз него во континуитет во подолг период се одлучил на еден ваков чин. Пријавениот во крим-евиденцијата на СВР Скопје е регистриран како сторител на помали кривични дела од областа на имотните деликти за што од Судот му биле изрекувани воспитни мерки, мерки за засилен надзор и казни затвор - изјави министерката Гордана Јанкуловска.

КОЛАТЕРАЛНА ШТЕТА?

Она што многумина го тврдеа вчера беше дека полицаецот и велешанецот Андреевски биле колатерална штета и дека тие немале никаква врска со „бизнисот“ меѓу убиецот и ‘Ркулот. Други се прашуваа што правел полицаецот на иста маса со познат криминалец.

Милошев работел во Шестата управа во одделот за обезбедување за странски делегации и неофицијално е роднина на Дејан Митковски-Урко, шеф на обезбедувањето на премиерот Никола Груевски.

Неговите пријатели велат дека бил колатерална штета.

- Ни крив ни должен настрада. Се најде на погрешно место во погрешно време. Тврдам дека тој немаше никаква врска со убиецот - вели еден од пријателите на убиениот полицаец, кој сакаше да остане анонимен.

Министерката за внатрешни работи вчера не сакаше да коментира што правел полицискиот службеник во ресторанот.

- Не сакам да ги коментирам семејните врски на жртвите на инцидентот. МВР не располага со информации дали станува збор за случајна средба или претходно познанство од каков било тип. Понатаму во истрагата ако дојдеме до нови моменти, ќе бидете изв естени - рече Јанкулоска.

Велешани вчера беа поделени во мислењата зошто и како се случило убиството. Дел жалеа што двајца велешани загинале, а дел пак тврдеа дека криминалците најчесто така завршуваат. Многумина имаа негативни коментари за ‘Ркулот, кој важи за познат криминалец во градот.

- Жално е што покрај него загинале и други луѓе, а можело да загинат и обични минувачи, деца, жени... Неговата соработка со полицијата не го спаси од пишаната судбина - вели велешанец.

Полицијата во првите шест месеци од годинава регистрирала 46 кривични дела спречување службено лице во вршење службено дејство. Во истиот период лани биле регистрирани 45 случаи од ова кривично дело. Според полициската статистика, 62 полициски службеници биле нападнати при вршење работи во безбедноста. Лани полицијата регистрирала 51 напад врз службено лице при вршење работи во безбедноста. За овие кривични дела се осомничени 150 сторители.

http://dnevnik.com.mk

Адвокатска приправничка го преживеала нападот во „Биг фиш“