СКОПЈЕ 2014 или ЛУНА ПАРК '14

Проблемите на стечајците се селат пред владата?

Сашка Цветковска	Коментари (0)

Со петте деца и овие две пластични ќеси кои го претставуваат сиот имот на оваа двојка, Сашо и Билјана Трајковски денес излегоа пред владата. Не за да штрајкуваат, туку за да живеат. Немаат куќа, немаат пари за кирија, немаат работа.

Живеат по улици, по пријатели, кога како ќе се снајдат. А за апсурдот да биде поголем, државата не им одобрила ниту социјална помош.

„Социјална помош не земаме три години. Сите документи што требаше да ги однесеме, директорката Гордана ги прими. Се што требаше, не знам зошто, по која вина, по нивна вина, не добиваме социјална помош“, вели Билјана Трајковска.

Петте деца, од кои едното има само седумнаесет месеци, не одат редовно на училиште. Кога имаат сместување ги праќаат, кога немаат талкаат со нив во потрага по добри луѓе кои можат да ги примат. А болна е и ќерката. Болеста ја добила пред извесно време, кога подолг период морале да спијат под ведро небо.

„Девојчето е болно од ова што се случи. Од октомври наваму се е под дејство на лекови“, рече Сашо Трајковски.

Сашо протестира со стечајците од Куманово. Порано работел во градежната компанија Маврово. По нејзината приватизација неколку години е без работа. Повеќе пати барале помош од државата. Одел и кај пратениците од власта избрани во Куманово, но освен еден пакет со храна досега не добил ништо.

„Многу сум лута што пратениците од Куманово не сакаат да не ислушаат. Не повикаа еднаш и ни рекоа пред Нова Година дека се ќе се среди. Му кажавме на пратеникот Поп Арсов, а тој не не ни ислуша“, изјави Билјана Трајковска.

Денес претставници од владата го примија семејството. Им ветиле дека ќе размислат како да им помогнат, а тие за тоа време да се вратат во Куманово. Сашо ги послушал, но вели трпение нема. Сега пак е во зградата каде што се штрајкува во Куманово. Ако не чуе одговор За два дена се враќа за дефинитивно тука да живее. А две недели подоцна, на втори Март ќе му се придружат стечајците од цела република, кои ги загубиле работните места за време на приватизациите на фирмите во кои работеле.

ИВЗ: Ако има црква на плоштадот ќе има и џамија

Во моментот кога ќе почне да се гради црквата на плоштадот - ние ќе почнеме да ја градиме Бурмали џамијата.

Ова е ставот на поглаварот на ИВЗ Сулејман Реџепи, кој преку албанските партиски лидери ќе се обиде да стигне до дозвола за изградба на џамијата - ќе бара од премиерот Груевски да свика лидерска средба на која ќе се отвори горливото прашање за Муслиманите во земјава.

ИВЗ ги радикализира ставовите и не се откажува - ако има црква на плоштадот, тогаш ќе има и џамија.

„Следниот чекор ќе биде најверојатно од озбилен карактер. Ние како ИВЗ ќе се обратиме до премиерот. Од него ќе побараме тој да закаже лидерска средба, со сите челници на сите политички партии во државата, каде што ќе бидат присутни претставниците на верските заедници“, изјави Реџепи.

ИВЗ бара истиот аршин што важи за Македонската православна црква - да се применува и за нивната верска заедница. Бурмали џамијата не може да се мери со црквата „Константин и Елена“, бидејќи првата постоела петстотини години и била урната од српскиот зулум, а втората била уништена од земјотрес.

„Владата на Република Македонија е должна она што го стори према МПЦ да го стори за ИВЗ на Македонија“, додаде Реџепи.

Исламската верска заедница уште минатата недела ја обвини Владата дека нема чувство за духовните и за другите потре*и на муслиманите во Македонија. Им се приклучи и турската заедница, која побара во проектот „Скопје 2014“ да се вметнат скулптури од султани од Отоманската империја. Владата пак, се оградува од барањата на верските заедници и топката ја префрла на општината Центар.

Почина човекот што го шетаа по клиниките

Елена Ацевска

Почина 47-годишниот Душко Мамучевски од Берово на Клиниката за урологија. И покрај интервенциите на раните предизвикани од тешката инфекција и гангрена, пациентот не преживеа.

Душко Мамучевски во саботата со часови во амбулантна кола беше шетан низ Скопје, бидејќи лекарите од хируршките клиники не сакаа да го хоспитализираат, го препраќаа за Штип.