FENIX-ЗАСЕКОГАШ

Седумдесет и шест годишна пензионерка од покраината Шлезвиг-Холштајн во Германија, направила штета од 40.000 евра додека се обидувала да излезе од паркингот.

Бабата-возач додека излегувала од паркингот,„собрала“ еден автомобил, по што го замолила полицаецот, кој случајно се нашол на местото на настанот, да го прекине сообраќајот, како би можела мирно да се отпаркира. Откако полицаецот ја послушал, бабата во рикверц се залепила до едно мини комби. Потоа во паника, притиснала на педалата за гас и се удрила во светлечки столб.

Додека полицаецот пришол за да и‘ помогне на бабата, пензионерката, максимално испаничена додала гас и се удрила во едно BMW, кое од ударот се забило во дрво. Потоа повторно го ставила автомобилот во рикверц, притиснала гас и удрила во паркиран Нисан, кој потоа се забил во комби Мерцедес.

Дури ни откако удрила четири автомобили, решителната баба не застанала. Пробала уште еднаш, па со себе собрала сообраќаен знак, уште едно BMW и едно Волво. Дури тогаш полицаецот успеал да влезе во автомобилот и да го прекине „веселото“ возење.

- Тоа беше како во лош филм. Моторот на автомобилот работеше и бабичката беше незапирлива, изјави портпаролката на полицијата, Јана Кралиш.

Бабата го добила автомобилот како подарок од својот син, ова лето, и пред да се „пушти“ во сообраќајот, земала неколку дополнителни часови за возење, кои очигледно не вродиле со плод.