НОВИТЕТИ

http://www.idividi.com.mk/stil/Avtosvet/471438/index.html

 

Најдобри автомобили по класи

Конечно сте се одлучиле да купите нов автомобил, но радоста за подновување може да стане вистински кошмар, затоа што освен вашите потреби, секогаш треба да ги имате предвид и потребите на вашето семејство или пак на компанијата. За да не се најдете во ваква ситуација ви претставуваме кои се најдобрите автомобили во најпопуларните класи. Вам ви останува да си ја измерите длабочината на џебот и да го изберете најсоодветниот автомобил за вас.

Mini Cooper  Ако се прашувате зошто го одбравме токму овој модел, одговорот е едноставен, Се водевме од цената, квалитетот, капацитетот, пространоста, безбедноста но и гарантниот рок кој го има ова возило. Бензинците на овој модел се најпопуларни кај купувачите. Сметаме дека секој од нас би требало да располага со возило кое дава барем 10 KS на 100 килограми маса, кое ќе поседува ABS- и клима уред.

Одлично мало градско возило

Seat Ibiza – новиот шпански градски компакт е втор модел од VAG концернот, после Škoda Fabia, кој ја искористи PQ25 платформата Volkswagen наменета за идната генерација на VW Polo. Предност на новата платформа се зголемените димензии и пространоста, како и помалата маса, како и значително подобрените возни карактеристики и управувањето.

Mini Cooper – популарниот Mini дефинитивно е најголемиот и најскапиот шминкер во класата. Зад ретро дизајнот се кријат најдобрите возни капацитети во класата, пред се би ја истакнале одличната суспензија, 1,6 литарскиот бензински мотор, создаден во соработка со BMW и Peugeot. Mini исто така и најдобро котира меѓу сите мали градски возила.

Компакти

Ford Focus – веќе со години го држи епитетот најдобар автомобил и тоа од повеќе причини Компактот од Форд е достапен, простран, ги има најдобрите возни карактеристики во класата (има одлична суспензија, одличен рачен менувач, кочници и управувач. Единствен недостаток, ако се спореди со првата генерација, е тоа што има конзервативен дизајн на кој не му помогна ниту неодамнешниот face-lifting.

BMW серија 1 – на некои, особено на љубителите на спортски автомобили, ќе им биде доволна информацијата дека станува збор за единствениот автомобил од оваа класа со погон сместен во задниот дел на возилото. Не постои автомобил во оваа класа кој нуди поголемо задоволство при возење и кој има подобри перформанси.

Лимузини од средна класа

Škoda Octavia – иако можеби некој ќе каже дека овој автомобил спаѓа во пониската класа и дека Škoda во оваа класа го има Superba, сепак овој модел има супер димензии, а ги задоволува и останатите критериуми. Octavia ги задоволува сите услови. Чешката лимузина нуди идеален компромис меѓу квалитет, дизајн, пространост и возни карактеристики. Таа во ниту еден од овие критериуми не е најдобра, но ниту еден во класата не нуди подобар спој на сите наведени ставки за пониска цена.

Audi A4 –лимузина од средната класа изгледа поатрактивно од кога и да е, речиси подеднакво добро како coupe A5, а благодарение на новата помодерна платформа, A4 профитираше и во поглед на возните карактеристики, поради кои досега беше ставан зад лутите ривали BMW серија 3 и Mercedes C-класа. Германците го зголемија и квалитетот, па така A4 од внатре изгледа и делува како значително поскапиот и поголемиот A6.

Моноволуменски

Opel Zafira – моноволуменот од Russelsheim всушност ја дефинира оваа класа на автомобили, а и денеска, со последната инкарнација, моноволумен за седуммина. Ако се одлучите за овој модел нема да згрешите. Zafira изгледа доволно добро, не се вози како комби, туку како обичен автомобил. Нуди феноменален и пред се наједноставен концепт за распоред на седишта, односно слободен простор. Што би можеле да посакале од еден моноволумен? Да изгледа подобро и да вози подобро?

Ford S-Max – ако барате одговор на горното прашање, тогаш S-Max дефинитивно е најатрактивниот MPV на пазарот, со најдобри возни карактеристики, S-Max исто така е носител на наградата за европски автомобил за 2007. година. Сепак му недостига идеално слободниот простор на Zafira, а и багажот му е нешто помал. Но, сепак рековме дека не постои совршен автомобил

SLR McLaren Roadster 722 S

За претстојниот париски саем за автомобили, кој ќе се одржи од 04-ти до 19.10.2008 година, Mercedes-Benz подготви специјално издание на SLR Roadster, кој ќе се појави под ознаката 722 S.

722 изданието е базирано на hardtop изданието на Mercedes SLR, претставено пред точно две години на парискиот саем, сега во француската престолнина пристига и претпоследната изведба на SLR, која ќе го добие суфиксот S.

За потсетување, Mercedes-Benz SLR McLaren 722 Edition настана во чест на незаборавната победа на британските легенди Стирлинг Мос и неговиот совозач Денис Џенкинсон на трката Mille Miglia во 1955 година, и тоа со стартно време 7:22.

Како и „обичното“ 722 Edition, така и S изданието ќе го движи 5,5-литарскиот V8 мотор, рачно изработен од AMG. Погонот со помош на компресорот ќе развива 650 KS и 820 Nm вртлив момент.

Преносот е петстепенски, автоматски, за 3,7 секунда развива до стотка, односно за 10,6 секунди до 200 km/h. Максималната брзина изнесува 335 km/h. 722 S доаѓа со 10 mm пониска суспензија, потврди амортизери, со посилни карбонско-керамички кочници и со поаеродинамичен bodykit.

Како и 722 Edition, така и 722 S ќе биде произведен во 150 примероци, а продажбата на европскиот пазар се очекува кон почетокот на јануари 2009 година.

Извор: ИДИВИДИ

Претставен Audi A1 Sportback

Главна париска атракција на производителот од Инглошатд е студиската најава на малиот премиум автомобил. Станува збор за концептот A1 Sportback, кој е олицетворение токму на она што во блиска иднина и се очекува од Audi.

За потсетување, ова е втор A1 концепт, првиот беше токискиот Metroproject Quattro. Основната разлика ја прават дополнителните врати на париската студија. Покрај петте врати, A1 Sportback е 3,99 метри долг и 1,75 метри широк.

A1 Sportback го движи 1,4-литарски TFSI мотор со 150 KS, во комбинација со електричен мотор од 27 KS и со максимален вртлив момент од 150 Nm. Со помош на 7-степенскиот S-tronic менувач овој plug-in хибриден погонски склоп го придвижуваат предните тркала.

Електричниот мотор, покрај тоа што го помага конвенционалниот погон, со помош на енергијата која ја црпи од сетот литиумски батерии може и самостојно да го движи автомобилот, но на кратки релации.

Според фабричките податоци, овој концепт-автомобил постигнува забрзување од 100 km/h за само 7,9 секунди, додека максималната брзина изнесува 200 km/h. Просечната потрошувачка на гориво изнесува 3,9 литри на 100 километри, а емисијата на јаглерод диоксид е се на се 92 g/km.

Секако треба да се спомене и stop-start системот, со кој наведените бројки можат донекаде и да се намалат. Тука е и прогресивниот електромеханички управувач и суспензијата која дополнително го подобрува управувањето на автомобилот.

Претходно, како основна разлика меѓу Metroproject и Sportback го споменавме дополнителниот пар на врати, но тука е и новиот дизајн на маската на моторот, спуштената линија на кровот, 18 цолните бандажи и слично. Во богато опремената внатрешност може да се сместат четири возрасни лица.

Рестилизирана Mazda MX-5

Mazda конечно ги објави деталите за рестилизираниот roadster MX-5 и тоа на саемот за автомобили во Париз. Моделот кој се очекува да се појави во текот на следната година има редизајниран преден дел, прагови и заден браник.

Силен впечаток кај новата Mazda MX-5 остава предниот браник со големите процепи за воздух, штитниците од кал, како и нагласените прагови.

Ентериерот не претрпе значителни измени, освен новиот панел со инструменти и  Recaro седиштата. Овој пат копманијата се одлучи за нешто потемна нијанса на ентериерот.

Mazda MX-5 е достапна со 16 и 17 инчни тркала и алумниумски бандажи. Каросеријата се среќава во неколку бои и тоа алуминиум, метрополитан сива и сончогледово жолта.

Максималната брзина на моторот е зголемена на 7.500 вртежи во минута. Максималниот вртлив момент е 188 Nm. Менувачот и понатаму е мануелен и шестстепенски.

Редизајнираната Mazda MX-5 на европскиот пазар се очекува во првата половина на следната година.

Kangoo Be Bop

Базиран на Kangoo Compact концептот, претставен на минатогодишниот саем за автомобили во Франкфурт, Renault на тековниот париски саем го претстави Kangoo Be Bop.

Новиот член на Kangoo фамилијата е долг 3,87 метри, има двобојна каросерија и ексклузивен ентериер. Автомобилот е наменет за купувачите кои сакаат поинаков изглед и решение.

Be Bop би требало да им се допадне на урбаните купувачи, кои особено ја ценат забавата и дружењето, па оттука не е ни чудно што главната идеја при конструирањето на овој модел била пространоста и осветленоста на внатрешниот простор на возилото.

Kangoo Be Bop се разликува од стандардните возила од овој тип и тоа по скратениот простор за моторот, по специфичните предни светла, специјално дизајнираните браници и 16 инчните алуминиумски бандажи. Што се однесува до опремата, за првпат во еден модел на Kangoo се нуди опцијата вградување на Carminat Bluetooth® CD навигациски систем.

Овој систем нуди цела низа на функции (7" TFT, Bluetooth) и тоа за особено поволна цена. Во делот за ракавици се наоѓаат USB и iPod конекторите, додека аудио системот се управува со помош на командите на воланот.

Внатрешноста на релативно малиот автомобил, благодарение на исправената положба на седиштата и на високиот кров овозможува комфорно сместување на четири возрасни лица, а патниците од задната клупа можат да влезат во возилото и од вратата на багажникот.

Секако дека внатрешноста може да се модулира, односно може да се намалува или зголемува со отворање или склопување на задните седишта.

Renault како погон ги искористи познатите дизел dCi агрегати од 85 и 105KS, како и бензинецот 1,6 16V со 105KS. Силниот дизел мотор оди во комбинација со шестстепенски мануелен менувач, додека останатите два агрегата имаат петстепенски менувач.

Потрошувачката на послабиот дизел мотор е само 5,3 литри на 100 километри, при мешовити услови за возење. Сериски, со сите модели се испорачуваат ABS и ASR системите, а за полесното возење се задолжени стандардно вградените темпомат, автоматските светла и задните сензори за паркирање.

Ssang Yong - C200 концепт

„Ssang Yong“, јужнокорејскиот производител, кој уште од 2004 година е мнозински сопственик на кинеската „SAIC“, настапи на парискиот саем за автомобили со SUV концептот C200. C200 би требало да биде најава за големата офанзива на 20 нови модели, поставени на пет нови платформи, а кои ќе се појават во следните пет години. Проектот започнува со реализација од следната година.

C200 концептот го движи 2-литарски мотор кој силата ја пренесува на сите тркала. Директорот на британската филијала на „Ssang Yonga“,  Пол Вилјамс изјави дека C200 е особено важно возило за компанијата, бидејќи претставува демонстрација на новата стратегија.

Дизајнот на C200 го потпиша Giugaro, чија куќа „ItalDesign“ блиску ќе соработува со „Ssang Yong“ на новите најавени модели. Со оглед на фактот што „Ssang Yong“ е познат како произведувач на SUV возила, интересна е најавата дека наскоро ќе претстави и патнички автомобили.

Шангајската „SAIC“ ги купи правата на неколкуте Rover модели кои сега ги продава под името Roewe. Оттука не е ни чудно доколку некои од најавените патнички возила имаат напредна верзија на K серијата на некогашните бензински мотори на Rover. Како основа би можела да послужи X60 платформата на Rover.