Имотот на политичарите

Македонските политичари имаат богатство колку европските

Елизабета Галевска

Имотот на македонските министри не е тајна, тој е веќе објавен на интернет сајтот на Владата, но и на Државната антикорупциска комисија.

Транспарентноста е не помала од онаа на еврокомесарите, но во споредба со нив македонските политичари помалку или повеќе не заостануваат ниту во тежината на богатството, согласно пријавеното во анкетниот лист кога стапиле на должноста.

Претседателот на Европската комисија Баросо имал два стана, косопственик бил и на имот во Валпакос. Премиерот Груевски нема недвижен имот, но затоа има заштеда од околу 50.000 евра.

Две семејни куќи е недвижноста на еврокомесарката за надворешни Валднер, нашиот шеф на дипломатијата Милошоски во анкетниот лист пријавил две гарсоњери, помал заеднички стан, возило „Форд Фиеста“ од 1994 година, има и заштеда, но и кредити.

Комесарот за проширување Оли Рен имал еден стан во Хелсинки, косопственик бил на викендица, а поседувал и заедничка канцеларија. Вицепремиерката за евроинтеграции меѓу имотот што го пријавила поседува куќа од родителите, личен и семеен накит од 10.000 евра, но и други приходи до 50.000 евра годишно.

Фратини, потпретседателот на Комисијата, немал акции, но имал мала куќа во Италија. Вицепремиерот Ставрески има пријавено мала викендица во Охрид, сопругата во Дојран, заеднички стан во Америка, стан на сопругата во Скопје, две возила, како и заштеда над 20.000 евра.

Комесарот за животна средина Димас има неколку куќи - во Атина, во Коринт, апартман во Атина, две возила. Министерот Џелал Бајрами, пак, има стан во Пула и наследено семејна кука во Врапчиште.

Сепак, според објавените податоци, побогат меѓу министрите е Веле Самак, со личен имот вреден 450.000 долари.

Pozdrav