Деветтолетка

ОСНОВНИ ПРОБЛЕМИ СО НАСТАВАТА

Англиски со мака за првачиња

Освен табла и креда,нема ништо од планираните играчки, дивидија, списанија и други помагала, велат наставниците
Играчки од дома,измислени песнички и ископирани боенки се  помагала во  наставата по англиски во прво одделение, Тие не сакаат јавно да зборуваат за проблемот бидејќи се плашат за своите работни места. Часовите по англиски јазик во прво одделение се воведени оваа учебна година и се одржуваат еднаш неделно. Беше предвидено наставата да се одвива без учебници, а наставниците, според програмата на Бирото за развој на образованието, требаше да добијат пакет со флеш-карти, постери и играчки, касети со песнички, цедиња и дивидија, како и списанија на англиски.

УЧИТЕЛИТЕ КАКО ДАДИЛКИ

- Нема ништо од тоа, само табла, креда и нашата креативност. А децата ги привлекуваат и ги мотивираат само книги во боја. Се снаоѓаме како знаеме. Сечеме и лепиме сликички дома за да направиме постери, носиме кадифени мачиња и кучиња за да им ги покажеме, фотокопираме слики од интернет и им ги даваме да ги бојат. Сум била на многу семинари за англиски јазик и знам како изгледаат странските учебници. Се е шарено и привлечно за децата. А ние импровизираме. Испаѓа дека не сме наставници, туку дадилки - вели наставничка по англиски јазик од Скопје.Во книжарниците има голем број странски учебници и работни тетратки по англиски јазик за прво одделение, чија цена се движи од 400 до 600 денари. Наставниците велат дека од нив се бара на свој трошок да фотокопираат листови за учениците. Кога на советниците од Бирото им кажале за проблемот, тие им одговориле дека нема потреба родителите да се изложуваат на трошок и да купат учебник за еден час неделно. Тоа оправдување држи место, но децата се незаинтересирани ако не гледаат нешто интересно, не бојат, не лепат... Немаат сите училишта фотокопир, хартија и тонери. Не е точно дека не сакаме да работиме, како што не' обвини советничката од Бирото, но не може сите наставници да издвојат пари од мизерните плати да го платат сево ова - ни вели нашата соговорничка. Бирото за развој на образованието во минатиот месец во повеќе градови организираше семинари за оценување на наставата по англиски. Наставниците безуспешно се обиделе да им ги кажат проблемите на надлежните.

ПЕТИЦИЈА ДО МИНИСТЕРОТ

- Планираме да се организираме и да испратиме писмо до министерот за образование за да најде решение. Вака повеќе не може. Родителите бараат резултати, а ние сме немоќни да им ги дадеме - објаснува наставничка од Тетово.Родители велат дека децата не научиле ништо и се жалеле дека им е здодевно. Ќерка ми за цела година научи само десетина збора, па решив да ја запишам на к*рс по англиски во нејзиното училиште. Барем таму да научи нешто, кога не може на редовниот час - вели мајка на првоодделенка. Дознаваме дека наставници од неколку градови почнале да испраќаат петиции до Министерството за образование во кои бараат да се воведат учебници во наставата. Од Министерството за образование објаснуваат дека наставната програма за овој предмет ја изработиле во соработка со Британскиот совет и оти целосно одговара на потребите на првачињата.Децата на оваа возраст не знаат да читаат и да пишуваат, затоа не се предвидени учебници. Целта е првата година да се навикнат на англиските зборови преку слушање. Прирачникот што го добија наставниците им е доволен за да организираат настава, а не е точно дека не добиле придружни материјали. Во почетокот на годината секое училиште доби шарени постери, кои може да се искористат и за наставата по англиски јазик - објасни Дрита Мамути, портпаролка на Министерството за образование.
СТАВ
Играње со јазикот

Англиски со мака. Тоа би бил идеален наслов на учебникот наменет за овој предмет по кој пекаат речиси сите наставници. Кога тие алармираат дека нешто не штима во наставната програма, редно е надлежните барем да ги слушнат нивните маки. Зашто тие се маки и на родителите и на учениците. Ако не им веруваат, нека ги видат оценките и недвосмислените заклучоци - наставата е здодевна, а децата цела година не научиле речиси ништо. Копирање образовен систем на странска земја значи негово целосно преземање: настава без учебници, но со се' друго, вклучувајќи ги, на крајот, и европските резултати. Во спротивно, реформата ќе се сведе само на лош обид за модернизација на образовниот систем и ќе има спротивен ефект.Точно е дека новината е стара нецела година. Но, и тоа е доволно време за да се откријат слабостите и навремено да се реагира. Ако наставниците сметаат дека им е неопходен учебник и инсистираат да го добијат, треба да се послушаат. Паталците знаат повеќе од гаталците.

...ne sme zivi ako ne upropastime se... pocna ama ne se dovrshi... nema ucebnici...nema rabotni materijali...kasetofoni... i normalno krivi se nastavnicite...nikako onie od birot...ili ne daj boze tie od ministerstvoto... tie se bezgreshni... koga se podigaat plata od banka...ama mi e simpaticna izjavata na Drita... ucilishtata dobile posteri... Ajde lepoto dojdi pokazi im na nastavnicite kako cela godina da gi animiraat decata so  1-2 posteri....