Мејк ап-во слики и коментари

Во пресрет на најлудата ноќ сите имаме по малку тенденција да се предотеруваме, пренакитуваме и да употребиме многу шминка. Новогодишна елка веќе има, нема потреба да изгледаме како таква, особено кога станува збор за декоративната козметика.

За да ја избегнеме замката во која ќе изгледаме како елки или нашлакани торти, препорачуваме 3 едностани, но ефектни и моќни изгледи за новогодишната прослава:

Мачкини очи со црн туш

Тушот за очи ви е најдобар пријател за овој изглед. Одберете некој долготраен кој нема да се разлева и размачкува. Комбинирајте го со кармин во боја на модра слива, со полуматиран финиш. Кожата е чиста и мат, руменилото е природно и не премногу нагласено, а маскарата и долгите трепки задолжителни.

Перфектни зачадени очи

„Smokey“ или зачадените очи не излегуваат од мода. Комбинирани со веѓи со природен изглед и неутрални усни во праска или пудра-розова нијанса, акцентот паѓа врз очите. За пригодата употребете сиви и црни тонови на сенки со бисерен финиш и суптилна тенка линија со моливче исцртана во долниот дел од окото.

Смел црвен кармин

Акцентирани се усните, кои потсетуваат на црвено меко кадифе. Употребете долготраен мат кармин во жешка црвена или силна корална нијанса. Веѓите се малку понагласени, обликувајте ги посмело. Употребете и хајлатер за нагласување на горниот дел од усните и јаболчниците. Руменилото е бронзено, а очите се „чисти“, со само еден слој маскара.