Влијаније на исламската цивилизација во историјата

Хигиената во Европа ја донеле муслиманите



Смрдеата на телото некогаш се нарекувала „мирис на светоста“, инквизиторите ги прогонувале луѓето што се бањале, а денес, пак, во САД може да бидете исфрлени на улица ако мирисате лошо

Европејците смрделе во поголемиот дел од својата историја. Таа лоша миризба најмалку се чувствувала во римско време, кога јавните бањи биле места за општествено собирање, водење бизнис и за флертување. Околу нив биле организирани јавните куќи, продавниците, лекарските ординации, но и криминалците. Разговорот во Рим почнувал со прашањето: Кај се бањаше? Во својата книга „Чисто-несанитизирана историја на бањањето“, авторката Кетрин Ашенбург фрла поглед во хигиенските навики на луѓето од античкиот Рим до денес, раскажувајќи ги „валканите“ заплети што резултирале со денешната идеја за чистота на човечкото тело. Капењето на римски начин било одраз на хедонизам, славење на ласцивноста, се вели во написот на „Јутарњи лист“.

Свети Ероним им препорачувал на девиците да не пијат вино, зашто тоа ја грее крвта и да не се капат зашто тоа може да ги поттикне да покажат интерес за сопствениот изглед.

- Чистото тело и чистиот фустан значат нечиста душа - говорела монахињата сестра Паула од Витлеем.

И покрај тоа бањите некаде опстојувале со векови, иако почесто на истокот отколку на западот на Римското Царство.


Арапите - муслиманите НАЈЧИСТИ НА СВЕТОТ

Кога Турците го освоиле Истокот, затекнатите бањи ги претвориле во амами. На Пиринејскиот Полуостров, пред христијанската реконквистада, се зборувало дека андалузиските Арапи се најчисти на светот, додека христијаните од северот ја носат облеката додека не им се распадне. Кога Шпанија повторно била освоена, чистотата и бањањето биле поврзувани со Маврите и со ересот. Да се одржува хигиената, таму значело да се биде муслиман.

Физичката нечистотија станала знак за морална чистота и за исправна вера кај христијаните. Улрих, свештеник од Клуни, во 11. век пишувал дека тој и манастирските браќа се капат двапати годишно - пред Велигден и пред Божиќ. Во споредба со селаните и тоа било двојно повеќе. Европа во тие векови навистина била чувствувана по „мирисот на светоста“, како што била нарекувана човечката смрдеа. Инквизицијата долго практикувала да наведува во обвиненијата на осомничените еретици дека се познати по тоа што се бањаат. Заминувањето во Крстоносните војни и средбата со амамите го поттикнале враќањето на старите обичаи во дел од Европа. Почетокот во највалканиот период од европската историја се случил кон крајот на Средниот век, по избивањето на епидемијата на чума. Неспособни да објаснат што се случува, научниците од парискиот универзитет му напишале на кралот Филип Шести дека „несреќното поклопување“ на Сатурн, Јупитер и Марс предизвикало од земјата и водата преку воздухот да се прошири страшна зараза.


ЛУЈ ШЕСНАЕСЕТТИ СЕ ИЗБАЊАЛ ЕДНАШ

Англиската кралица Елизабета Прва тврдела дека се бања еднаш месечно, без оглед дали е валкана или не. Изабела од Шпанија во 1601 година ветила дека нема да се избања додека трае опсадата на Остенде и го остварила ветувањето издржувајќи три години, три месеци и 13 дена, исто како и нејзините војници. Францускиот крал Луј Тринаесетти скромно утврдил дека наследил барем нешто од својот татко - пазувите му смрделе на пот. Луј Шеснаесетти првпат се избањал кога наполнил седум години, иако нозете му ги измиле две години претходно. Подоцна се заколнал дека никогаш нема да се бања, зашто по тоа искуство, препорачано од лекарите, му се влошило здравјето. Спиел во голем кревет со балдахин, па смрдеата, која наутро морале да ја трпат слугите и лекарите што го буделе, била понеподнослива од онаа што морала да ја поднесува неговата љубовница. Тогаш се проширил обичајот за менување на облеката повеќепати во денот. Милионскиот Париз имал две јавни бањи, но тие, пред се', биле бордели. Дури кон крајот на 18. век зачестиле книгите со совети за чистота. Некои во Европа почнале да се бањаат во студена вода, но без сапун, зашто таа не можела да влезе во телото и да ги наруши телесните течности.


ЧИСТОТА, МОРАЛ, РЕД

Кога Француската револуција стави крај на еден период во историјата на белиот човек, се сменила и идејата за приватност. Сите сметале дека заслужуваат сопствен кревет, па така заедничките кревети за членови на семејството, спиењето покрај непознати во евтините преноќишта и заедничките гробници станувале се' поретки. Ширењето на приватноста се проширило и на мирисите на телото. Постепено, во текот на 19 век и почетокот на 20 век, почнало да се смета за непристојно да се почувствува мирисот на другиот, односно тоа да се дозволи. Да не се покаже вистинската миризба на телото значело да се сочува достоинството. Најдалеку во тоа отишле Американците, кои граделе куќи со тушеви и бањи. Кога во текот на Кримската војна Флоренс Најтингејл покажала дека хигиената може да ги намали воените загуби, тој совет бил екстремно прифатен во американската Граѓанска војна. Војниците добивале пакетчиња за лична хигиена и се сметало дека валкан човек не може да биде ни добар војник. Чистотата значела морал, ред и реформа, а нечистотијата се сметала за примитивна и за хаотична. Во Европа таа револуција се одвивала потешко и побавно.

http://www.dnevnik.com.mk/default.asp?ItemID=94E88A606F353342940C1D894B69AF96

www.povikkonvistinata.org/islam/index.php?option=com_content&view=article&id=586:2012-01-02-16-29-44&catid=64:2011-10-07-12-39-27&Itemid=108


Изменето од MalcolmX - 11.Март.2012 во 14:04