Веројатно често ја имате дилемата: бензинец или дизел? Исправени сте пред предизвикот да ја донесете вистинската одлука. Со предностите и недостатоците на двата типа бензински мотори кои ви се на располагање при избор на нов автомобил, како и со парите и кредитите кои ви се на располагање навидум имате тешка задача - поголема инвестиција на почеток (што би значело и повисока месечна рата за кредит или лизинг) и поевтин километар со новиот автомобил, или помала инвестиција (со набавка на бензински мотор) со помала месечна рата за отплата, но со поскап километар?

Во услови кога се приближуваат цените на бензин и дизел горивата и кога се изедначуваат во перформанси бензинските и дизелските мотори, голема е промената на прагот на исплатливост на дизел возило во однос на бензинец.

koli.com.mk  е тука да Ви ја олесни задачата.
Нема да ви кажеме што да купите, само ќе ве насочиме да размислувате во вистинската насока и кои критериуми да ги имате при правењето пресметкa.

НАПРАВЕТЕ СИ ЈА МАТЕМАТИКАТА САМИ
Многу е едноставно. Не верувајте на некои генерални математики дека дизел ќе почне да се исплаќа на 5-тата или 10-тата година, или ако поминете 90.000 или 100.000 километри. Направете си ја математиката сами. Секој автомобил е различен, по својата потрошувачка (во град, на отворено или комбинирано) и по цената (набавната, а секако и продажната, каде дизелот повторно ќе има повисока цена во моментот на продавање на возилото). Пресметката ќе ви покаже која е границата на исплатливост при набавка на нов дизел автомобил, т.е. кој е бројот на километри кој треба да се помине за дизелот да почне да ги враќа парите. Доколку месечно проаѓате релативно малку километри, речиси ниеден дизел автомобил нема да ви биде исплатлив, и обратно – колку повеќе возите – толку е поголема веројатноста дека дизел моторот е исплатлива инвестиција за Вас.

На ум треба да имате неколку битни фактори преку кои ќе детерминирате што Вам најмногу ви одговара:
- колку километри поминувате месечно (или годишно)
- каде ги поминувате (во град, на отворено или комбинирано)
- која е разликата во потрошувачката на бензин и дизел мотор за даден модел на автомобил
- која е разликата во набавната цена на бензинецот и дизелот
- која е разликата во преостанатата вредност н автомобилот (вредноста на автомобилот што ќе ја има во моментот на негово продавање – дизелот и тогаш ќе има повисока вредност)

ТАБЕЛА НА ИСПЛАТЛИВОСТ НА ДИЗЕЛ НА НАЈПОПУЛАРНИТЕ МОДЕЛИ ВО МАКЕДОНИЈА
Во продолжение се наведени повеќе популарни модели на македонскиот пазар и табели на исплатливост на дизел модели. При пресметките, сметана е потрошувачката која ја дава произведувачот и направени се различни пресметки за трите типови на возење - во град, на отворено (штедливо, околу 90 KM/h, а не 140 km/h, кога потрошувачката се изедначува со онаа во град), како и во комбинирани услови на возење.

Од табелата може да се извлечат неколку заклучоци:

Ако се смета возење само во град, Citroen C3 1,4 HDi е најисплатлив дизел, кај кој годишно треба да се поминат околу 5.600 km за да се исплати купување на дизел модел. Се што е над таа бројка ќе биде во прилог на исплатливост на дизелот. За поминати помалку од 5.600 Km годишно со C3-ка – дизелот не е исплатлив. Блиску до него, во врвот на таа листа се и  Ford Fiesta 1,4 TDCi, со потребни 5.700 Km, како и моделите од повисоките класи Audi 2,0 TDI (6.300 Km), VW Golf 1,9 TDI (7.900 Km) и Opel Astra GTC 1,7 CDTI (8.100 km).

CLIO и PUNTO - РЕЧИСИ НЕИСПЛАТЛИВИ ДИЗЕЛИ
Од популарните и прилично продавани модели кај нас, во однос на моделите што ги споменавме погоре, не е многу исплатлива набавката на Renault Clio 1,5 dCI и Fiat Grande Punto 1,3 MJet, затоа што за нив, за да го поминат прагот на исплатливост потребно е да се извозат повеќе од 10.600 односно 13.100km годишно. Интересно, поради малата разлика во потрошувачка на дизел и бензин моторите на отворено, Clio-то доколку се вози само на отворено треба годишно да помине неверојатни 40.000km. Ако тука се земе в предвид најчестиот кредитен период (5 години, 60 рати), излегува дека Clio-то во тој случај дури после 200.000 поминат километар ќе почне да ја враќа инвестицијата во дизел модел.

Заклучоците се интересни – некои дизели се исплатливи за во град (C3-ka, Fiesta…), некои не (BMW 318d, Punto, Clio), некои се исплатливи за на отворено (повторно Fiesta и C3-ка, потоа Astra GTC 1,7 CDTI, Audi A4 ), а некои се помалку неисплатливи за на отворено (BMW 318d) и посебно Renault Clio / 1,5 dCI.

Затоа, пенкалото и дигитронот во рака и... математика!