Љубов - Мост на Љубовта

Се повеќе парови од главниот град на златната ограда на мостот кај МАНУ заклучуваат катанец, симбол на нивната љубов, а клучот го фрлаат во реката...

Како и повеќето европски метрополи, од неодамна и скопјани добија Мост на љубовта.

На мостот кај МАНУ, кој го носи името Мост на револуцијата, се поголем број млади парови својата љубов ја одбележуваат со заклучување на катанец на оградата од мостот. Така, на едната страна, на средината на мостот, може да се забележат поголем број закачени катанци, а повеќето од нив се изгравирани со имиња, срциња или датум.

Катанецот е синоним за вечна љубов, а симпатичниот ритуал на неговото заклучување на мост е насекаде ист. Катанецот најпрво се означува, онака како што парот тоа го осмислил, потоа се заклучува на оградата на мостот и на крај клучот се фрла во реката за љубовта вечно да трае.

По примерот на жителите на Париз, Прага и многу други европски градови, така и младите во нашиот главен град почнаа да покажуваат својата романтична страна и се почесто да го практикуваат овој ритуал.
Вакви мостови каде што катанците се закачуваат како симболи на љубовта се веќе подолго време се на туристичките мапи на европските метрополи, па така во Чешка, Франција, па и Кина, Тајланд Уругвај има вакви мостовите чии огради се цели прекриени со катанци.

Најпознатиот мост на љубовта Мостот на уметноста, се наоѓа во Париз, а неговите две огради се зафатени со катанци на парови од целиот свет, па затоа ова место се смета за едно од најромантичните во светот. Корените на овој обичај на закачување катанци датира многу одамна и прв пат се појавил во Кина, а денес е проширено во целиот свет.