Историја и политика - Инцидент меѓу пазарџиите и полицијата во

Со шишиња, камења и цигли, жителите на Шуто Оризари ги бранеа своите тезги. Акцијата за заплена на текстилна стока од фалсификувани марки заврши со директен судир помеѓу населението и специјалците.

20-тина полицајци се повредени, а 4 полициски возила искршени - соопшти МВР. Од друга страна не е познат бројот на повредени или однесени во болница.

Повеќе од еден час траеше пресметката за пазарот во Шутка.

Жителите го блокираа и влезот и излезот во населбата, полицајците во средина направија 4 коридори за да се извлечат од епицентарот на нередите. Незадоволството кулминираше после пладне, инспекторите повикаа засилување по што стигнаа околу 200 припадници на Единицата за брзо распоредување.

Камења од сите страни летаа кон полицајците но и кон екипата на Канал 5. Специјалците од единицата за брзо распоредување ги враќаа камењата и циглите назад кон демонстрантите.

Пукаа и со чадни бомби во обид да ја растурат групата од друга страна. Градоначалникот Елвис Бајрам на патерици помеѓу двете завојувани страни- ги повикуваше да се повлечат и да не се провоцираат.

Во буката тешко дека некој го слушна, продолжија нередите. Дел од пазарџиите се заклучија на пазарот, жители на Шутка од прозори им даваа поддршка на незадоволните.

По цел час состојбата почна да се смирува, полицајците се повлекуваа кон своите комбиња и ги наполнија со запленетата стока.

Војна за нелегалната стока на пазарот во Шутка