Фан клуб Горан Пандев

Наполи и Интер во преговори за Пандев

Откако обезбеди пласман во Лигата на шампионите за следната сезона, Наполи почна да бара засилувања и едно од првите имиња на листата желби е македонскиот напаѓач на Интер, Горан Пандев. Според "Кориере дело спорт", претседателите на Наполи и Интер, Аурелио де Лаурентис и Масимо Морати, разговарале за можните преговори за време на завчерашниот дуел на двата тима во Неапол, кој заврши без победник 1:1.
Покрај Пандев, "аѕурите" се заинтересирани и за Кениецот Мекдоналд Марига, а "нераѕурите", пак, од поодамна сакаат да го донесат Словакот Марек Хамшик на "Џузепе Меаца". Сепак, италијанскиот весник пишува дека, и покрај тоа што Наполи ќе игра во Лигата на шампионите, трансферот на Пандев е малку веројатен поради неговиот скап договор со Интер.
Претходно, Горан Пандев, кој заработува околу три милиони евра годишно во Интер, беше поврзуван со трансфер во Баерн Минхен и Ливерпул. По доаѓањето на Џампаоло Пацини од Сампдорија во јануари, струмичанецот почна да добива се помалку шанси во првиот тим на "нераѕурите" и веќе подолг период италијанските медиуми шпекулираат дека летово ќе си замине.

Интер го продава Пандев за добра понуда

Горан Пандев би можел да ги напушти редовите на Интер ова лето, но само доколку на адреса на клубот пристигне добра понуда.
При неодамнешното доаѓање во Македонија за квалификацискиот натпревар со Ирска, нашиот најдобар фудбалер најави дека ќе остане во миланскиот клуб и следната сезона, но не е исклучено да биде дел од зделката со Наполи, која би требало да го одведе словачкиот репрезентативец Марек Хамшик во спротивната насока.
- Дали ќе ги продадеме Горан Пандев и Мекдоналд Марига, зависи од типот на понудата што ќе ја добиеме. Во никој случај нема да постапиме спротивно на целите на клубот. Што се однесува до евентуалното заминување на Диего Милито, засега ќе останам тивок по тоа прашање - изјави извршниот директор на Интер, Ернесто Паолиљо.
"Нераѕурите" остануваат загреани да го доведат најдобриот играч на Наполи.
- Ние сме отворени за бизнис со Наполи и не ја исклучувам можноста за размена на играчи. Ќе бидеме трпеливи со Марек Хамшик и ќе одиме чекор по чекор - додаде Паолиљо

Шеикот од Малага го сака Пандев

Три шпански и еден германски клуб се заинтересирани летово да го донесат во своите редови македонскиот напаѓач на Интер, Горан Пандев, пренесува "Кориере дело спорт". Според италијанскиот весник, се работи за Валенсија, Севилја, Малага и Вердер.
Најверојатно е сценариото со Малага, чиј сопственик е катарскиот шеик од тамошното кралско семејство, Абдула ал Тани, кој летово тргна по стапките на богатите сопственици на Челзи и Манчестер сити и не штеди пари за засилувања.
Амбициозниот тим од шпанската провинција Андалузија вчера го купи Хоакин од Валенсија за четири милиони евра. Поранешниот шпански репрезентативец е шесто засилување за Малага летово, по Холанѓаните Руд ван Нистелрој и Јорис Матајсен, Французинот Жереми Тулалан и Шпанците Начо Монреал и Серхио Санчес. Аргентинците Диего Буонаноте и Мартин Демикелис, исто така, се нови лица на "Ла Росаледа", но нивните трансфери беа договорени уште во јануари. Тренер на Малага е поранешниот шеф на стручниот штаб на Реал Мадрид, Мануел Пелегрини.
Валенсија прва се распрашувала за Пандев, но не дошло до конкретна понуда, а слична е ситуацијата и со Севилја. Вердер, пак, чека да види како ќе се развијат настаните, пред да направи потег.

Пандев 100% останува во Интер

Најдобриот македонски фудбалер Горан Пандев и следната сезона ќе игра во Интер, иако во изминатите неколку недели беше поврзуван со трансфер во неколку клубови, меѓу кои предничеа Наполи и Џенова.
- Горан Пандев 100% останува во Интер. Неговите примања се превисоки за Наполи и Џенова, двата тима кои беа најзаинтересирани и контактираа со Интер - кажа неговиот агент Карло Палавичино за "Спортиталија" и стави крај на сите шпекулации околу неговото евентуално заминување од Интер летово.
Најблиску до негово ангажирање беше Џенова, бидејќи Интер сака да го купи аргентинскиот напаѓач Родриго Паласио, а "рособлу" во замена го бараше Пандев. "Нераѕурите" го понудија Кениецот Мегдоналд Марига, но Џенова инсистираше на македонскиот репрезентативец. Според италијанските медиуми, и самиот Интер се обидувал да го убеди Пандев да потпише за Џенова, бидејќи Македонецот сака да остане на "Џузепе Меаца" и да си го врати првотимскиот статус.
Претходно, подолго време заинтересиран беше Баерн Минхен, дури и пред да потпише за Интер, додека играше за Лацио. Во игра беше и Ливерпул, а се споменуваше и Малага, која сега има богати сопственици од Катар и не штеди пари на засилувања.
Пандев, како и останати играчи на Интер се на одмор до 10 јули, кога е закажана првата прозивка на тимот со новиот тренер Џан Пјеро Гасперини. Првиот официјален натпревар на "нераѕурите" е закажан за 6 август, кога во Пекинг ќе се сретне со Милан во италијанскиот Суперкуп.