Македонската репрезентација

   ФУДБАЛ - МАКЕДОНИЈА ВО ВЕЧЕРЕН ТЕРМИН ЌЕ ГИ ПОЧНЕ КВАЛИФИКАЦИИТЕ ЗА СП 2010

Градски ќе блесне за Шкотска и за Холандија

Спорт 5 кој ги поседува ТВ-правата ќе обезбеди монтажни рефлектори со кои почетокот за средбите на 6 и 10 септември ќе се помести на 20.45 часот

Градски во септември ќе биде осветлен со 1.200 лукса

Градскиот стадион во Скопје ќе блесне за септемвриските квалификациски натпревари од СП 2010, на кои Македонија ќе им биде домаќин на Шкотска и Холандија. Дополнителната светлина до 1.200 лукса што е потреба за одигрување еден фудбалски натпревар, по уривањето на северната трибина и рефлекторите од таа страна, со монтажни рефлектори ќе ја обезбеди имателот на ТВ-правата, германската компанија „Спорт 5“. Средбите од 9. квалификациска група со Шкотска и со Холандија, на кои Македонија ќе биде домаќин се закажани за 6 и 10 септември, а време за почеток ќе биде 20.45 часот. Овие средби првично ФФМ ги најави да се играат во дневен термин од 17 часот откако беа урнати рефлекторите од северната страна. Овој термин беше несоодветен за актерите, но и за „Спорт 5“, кој треба да ги продава ТВ-правата.

- По дводневното скенирање на ситуацијата на Градскиот стадион од страна на луѓето од „Спорт 5“ дополнителното осветлување е изводливо. Тоа е убавата вест за која деновиве ќе треба да ги известиме двете федерации, чии репрезентации ќе треба да ни гостуваат во Скопје, бидејќи првобитно беа запознати со ситуацијата на нашиот стадион и одигрувањето на натпреварите во дневен термин - вели Никола Костов, генералниот секретар на ФФМ. За реализација на квалификациските натпревари во вечерен термин со монтажни рефлектори, ФФМ доби согласност и од јавното претпријатие што стопанисува со Градскиот стадион.Претставниците на Шкотска, чија репрезентација премиерно ќе гостува во Македонија, досега двапати беа гости на ФФМ за да го организираат своето гостување. Шкотите најавија дека во Скопје ќе имаат и поддршка од околу 2-3 илјади свои навивачи. Со оглед дека северната трибина е во изградба, а на трибините зад головите го нема тој капацитет, дополнително ќе се разговара за сместувањето на гостите и можноста да го проследат натпреварот. Првичната најавена бројка за навивачи од Шкотска кои ќе допатуваат во Скопје може да биде и многу поголема. Затоа во договор со гостите, но поучени од убавите искуства од штотуку завршеното ЕП, ја разгледуваме можноста да организираме фан-зона на градскиот плоштад. Шкотските навивачи се мирољубиви и бараат само да има доволно пиво - додава Костов. Организирано следење на натпреварите на голем видеобим во Скопје беше направено во 2002 година, кога женскиот македонски ракометен првак Кометал Ѓорче Петровиграше во финалето за европската титула против австрискиот Хипо.